У Беларусі з лістапада павышаюцца пенсіі

1 лістапада, Мінск /Алена Прус - БЕЛТА/. У Беларусі з 1 лістапада бягучага года павышаюцца памеры працоўных пенсій, паведамілі карэспандэнту БЕЛТА ў Міністэрстве працы і сацыяльнай абароны. У адпаведнасці з указам ад 16 студзеня 2012 года №35 "Аб павышэнні пенсій" з 1 лістапада бягучага года праведзены пераразлік працоўных пенсій зыходзячы з сярэдняй заработнай платы работнікаў у рэспубліцы за трэці квартал. Па дадзеных Нацыянальнага статыстычнага камітэта, сярэдняя заработная плата за трэці квартал 2012 года склала Br4 млн. 37 тыс. 686. Гэта на 14,7% вышэй за сярэднюю заработную плату работнікаў за другі квартал гэтага года, якая прымянялася пры папярэднім пераразліку працоўных пенсій (у жніўні). У выніку пераразліку з лістапада 2012 года працоўныя пенсіі, пры вылічэнні памеру якіх не прымяняецца бюджэт пражытачнага мінімуму ў сярэднім на душу насельніцтва (БПМ), павялічацца на 14,7%. Адначасова з пераразлікам працоўных пенсій, заснаваным на росце сярэдняй заработнай платы, у лістападзе пералічаны мінімальныя працоўныя і сацыяльныя пенсіі, надбаўкі, павышэнні да пенсій і даплаты да пенсій асоб старэйшага ўзросту ў сувязі з ростам БПМ. Новы БПМ у параўнанні з папярэднім вырас на 4,3% да Br880 тыс. 30. Адпаведна на 4,3% павялічваюцца сацыяльныя пенсіі, надбаўкі, павышэнні і даплаты да пенсій. Так, з улікам новай велічыні БПМ памеры даплаты да пенсій непрацуючых пенсіянераў з лістапада складаюць для людзей, якія дасягнулі ўзросту 75 гадоў, - Br165 тыс. (75% мінімальнага памеру пенсіі па ўзросце), якія дасягнулі ўзросту 80 гадоў - Br220 тыс. (100% мінімальнага памеру пенсіі па ўзросце). У выніку пераразлікаў пенсій у лістападзе сярэдняя пенсія па ўзросце, па ацэнцы, павялічыцца на 14,1% і складзе Br1 млн. 964,3 тыс. Варта адзначыць, што памер пенсіі для канкрэтнага чалавека залежыць ад індывідуальных параметраў, якія выкарыстоўваюцца для разліку яго пенсіі, - стажу працы, індывідуальнага каэфіцыента. Фінансаванне расходаў на павелічэнне пенсій ажыццяўляецца са сродкаў Фонду сацыяльнай абароны насельніцтва Міністэрства працы і сацыяльнай абароны. Дадатковыя расходы на гэтыя мэты ў лістападзе гэтага года ацэньваюцца ў Br589,8 млрд. Па дадзеных на 1 верасня гэтага года, атрымальнікамі пенсій розных відаў у органах па працы, занятасці і сацыяльнай абароне з'яўляліся 2 млн. 495,2 тыс. чалавек.

Пенсійная сістэма ў Беларусі функцыянуе стабільна, пенсіі выплачваюцца своечасова, адзначылі ў міністэрстве. У бягучым годзе прымаюцца меры, накіраваныя на падтрыманне ўзроўню пенсій і іх пакупніцкай здольнасці. Так, у адпаведнасці з указам №35 з 1 студзеня 2012 года ўстаноўлена штомесячная дадатковая мэтавая даплата да пенсій непрацуючых атрымальнікаў пенсій у органах па працы, занятасці і сацыяльнай абароне, якія дасягнулі ўзросту 75 гадоў, у памеры 75% мінімальнага памеру пенсіі па ўзросту, ва ўзросце 80 гадоў і старэй - 100% мінімальнага памеру пенсіі па ўзросту. У лютым, маі і жніўні праведзены пераразлікі працоўных пенсій зыходзячы з сярэдняй заработнай платы работнікаў у рэспубліцы, а таксама мінімальных працоўных і сацыяльных пенсій, надбавак, павышэнняў і даплат да пенсій у сувязі са змяненнем БПМ. Па словах спецыялістаў, у студзені-верасня бягучага года ў параўнанні з адпаведным перыядам 2011 года сярэднямесячны памер пенсіі па ўзросту павялічыўся на 108,3% і склаў Br1 млн. 400 тыс., у тым ліку ў верасні - Br1 млн. 721,4 тыс. Сярэднямесячны памер мінімальнай пенсіі па ўзросту павялічыўся на 145,2% і склаў Br999,6 тыс., у тым ліку ў верасні - Br1 млн. 210 тыс. Рэальны памер пенсіі па ўзросту павялічыўся на 17,6%. Суадносіны мінімальнага памеру пенсіі па ўзросту і бюджэту пражытачнага мінімуму пенсіянера за студзень-верасень 2012 года склала 166,9%. На павышэнне ўзроўню пенсійнага забеспячэння грамадзян і аптымізацыю пенсійных выдаткаў накіраваны палажэнні ўказа Прэзідэнта ад 18 сакавіка 2012 года №136 "Аб мерах па ўдасканаленні пенсійнага забеспячэння грамадзян", які ўступіў у сілу з 1 кастрычніка бягучага года. У мэтах стымулявання больш позняга выхаду на пенсію прадугледжана прагрэсіўнае павелічэнне прэмій за працу без атрымання пенсіі пасля набыцця права на пенсію па ўзросту на агульных падставах. Палажэнні ўказа ўключаны ў законапраект "Аб пенсійным забеспячэнні" (2 кастрычніка прыняты ў двух чытаннях Палатай прадстаўнікоў Нацыянальнага сходу, 10 кастрычніка адобраны Саветам Рэспублікі). Для ўзмацнення сацыяльнай абароненасці шматдзетных маці, якія нарадзілі і выхавалі дзевяць і больш дзяцей і ўзнагароджаны дзяржаўнымі ўзнагародамі СССР або Рэспублікі Беларусь за мацярынства, прынята пастанова ўрада ад 8 верасня 2012 года №833, якая прадугледжвае магчымасць устанаўлення ім пенсіі за асаблівыя заслугі перад Рэспублікай Беларусь.-0-

БЕЛТА