17 жніўня, Мінск /Лілія Крапівіна - БЕЛТА/. У Беларусі захоўваецца залежнасць эканомікі ад імпарту. Пра гэта заявіў сёння старшыня Камітэта дзяржаўнага кантролю Аляксандр Якабсон на пасяджэнні КДК, дзе прааналізавана сітуацыя з імпартнымі закупкамі, а таксама пытанні імпартазамяшчэння, перадае карэспандэнт БЕЛТА. Аналіз паказаў, што захоўваецца залежнасць эканомікі ад імпарту. У затратах на вытворчасць прадукцыі практычна адна трэць прыпадае на імпартную сыравіну, матэрыялы, камплектуючыя і паліва. Па выніках першага квартала 2011 года сальда знешняга гандлю пагоршылася да адпаведнага перыяду мінулага года, канстатаваў Аляксандр Якабсон. Ён прызнаў, што 73% імпарту - гэта прамежкавыя тавары. "Так, у нас вялікі прамежкавы імпарт, такая спецыфіка таварнай структуры, няма сваіх энергетычных рэсурсаў", - адзначыў ён. Энергетычны імпарт у прамежкавым займае амаль палову. Гэта аб'ектыўны фактар, адзначыў старшыня КДК. Але калі адняць гэты энергетычны складнік, застаецца адмоўнае знешнегандлёвае сальда таварамі, якое ў першым квартале склала $650 млн. Такім чынам, непераканаўчымі з'яўляюцца довады некаторых спажыўцоў імпарту, што адмоўнае сальда ўзнікае з-за энергетычных тавараў. У першым квартале зноў вырасла імпартаёмістасць на 0,6 працэнтных пункта, заўважыў кіраўнік КДК.