Новы парадак устанаўлення паўторных выключэнняў з нацыянальнага рэжыму пры ажыццяўленні дзяржзакупак будзе распрацаваны ў Еўразійскім эканамічным саюзе, паведамілі БЕЛТА ў прэс-службе ЕЭК.
Новы парадак будзе распрацаваны на аснове базавага механізму, аб якім на пасяджэнні Савета ЕЭК далажыў член Калегіі (міністр) па канкурэнцыі і антыманапольным рэгуляванні Сяргей Жумангарын. "У выніку сумеснай працы з удзельнікамі ЕАЭС быў распрацаваны базавы механізм устанаўлення паўторных выключэнняў з нацыянальнага рэжыму, - адзначыў ён. - У далейшым ён дазволіць забяспечыць узаемны доступ прадстаўнікоў бізнесу да дзяржаўных закупак краін - удзельніц Еўразійскага эканамічнага саюза".
У цяперашні час Дагаворам аб ЕАЭС прадугледжана права дзяржавы ў аднабаковым парадку (згодна са сваім заканадаўствам) у выключных выпадках устанавіць выключэнні з нацыянальнага рэжыму пры ажыццяўленні дзяржаўных закупак тэрмінам не больш за два гады. "Сутнасць выключэнняў з нацыянальнага рэжыму ў тым, што пастаўшчыкі тавараў, работ і паслуг з іншых дзяржаў - членаў Еўразійскага эканамічнага саюза не могуць удзельнічаць у дзяржаўных закупках іншай дзяржавы-члена ў сувязі з тым, што механізм устанаўлення выключэнняў прадугледжвае магчымасць набыцця тавараў, работ і паслуг толькі ўнутры адной дзяржавы, - растлумачылі ў ЕЭК. - Па даручэнні Савета ЕЭК новы парадак будзе прадугледжваць, што ў выпадку наяўнасці пярэчанняў адной або некалькіх дзяржаў-членаў рашэнне аб немагчымасці ўстанаўлення паўторных выключэнняў з нацыянальнага рэжыму ў сферы дзяржаўных закупак будзе прымацца Калегіяй ЕЭК кансенсусам".