У фінал праекта "100 ідэй для Беларусі" выйшлі 119 аўтарскіх распрацовак

У фінал рэспубліканскага маладзёжнага конкурсу "100 ідэй для Беларусі" выйшлі 119 аўтарскіх распрацовак, паведаміла карэспандэнту БЕЛТА другі сакратар ЦК ГА "Беларускі рэспубліканскі саюз моладзі", куратар праекта Эліна Брага.

Распрацоўкі будуць прадстаўлены ў 16 намінацыях: 51 праект прэзентуюць школьнікі і навучэнцы сярэдніх спецыяльных і прафесійна-тэхнічных каледжаў і ліцэяў, 25 - студэнты і 43 - працуючая моладзь і маладыя навукоўцы. Усе яны пераможцы абласных (Мінскага гарадскога) этапаў конкурсу. "Самымі папулярнымі намінацыямі конкурсу ў 2017 годзе сталі "Інфармацыйна-камунікацыйныя тэхналогіі" (у фінал выйшлі больш за 20 праектаў) і "Медыцына, фармацыя, медыцынская тэхніка" (13 праектаў)", - адзначыла Эліна Брага. Сярод іншых асаблівасцей сёлетняга конкурсу яна назвала новыя намінацыі "Інклюзіўная прастора", "Інфармацыйна-камунікатыўныя тэхналогіі для людзей з інваліднасцю" і ўдзел у праекце людзей з абмежаванымі магчымасцямі на агульных падставах.

Сёлета фінальныя мерапрыемствы конкурсу "100 ідэй для Беларусі" пройдуць два дні. Урачыстае адкрыццё свята маладзёжнай навукі і інавацый адбудзецца 11 красавіка ў Мінску. "Тут можна будзе пагутарыць з героямі кнігі "100 ідэй для Беларусі", фіналістамі конкурсу і прадстаўнікамі рэспубліканскага экспертнага савета, азнаёміцца з новымі распрацоўкамі, фактычна гатовымі да камерцыялізацыі, - распавяла Эліна Брага. - Цэнтральнай падзеяй першага дня стане форсайт-дыскусія "IT і моладзь - беларускі прарыў". Сумесна з знакамітымі экспертамі маладыя людзі абмяркуюць шэраг актуальных тэм: ад агульных трэндаў лічбавай трансфармацыі да пабудовы лічбавай эканомікі ў Беларусі". У гэты ж дзень адбудзецца абарона праектаў. Членам экспертнага савета трэба будзе ацаніць не толькі актуальнасць і навізну ідэі, практычнае значэнне працы, але і рэальнасць яе рэалізацыі.

У другі конкурсны дзень, 12 красавіка, у выставачным комплексе "Белэкспа" адкрыецца інтэрактыўная выстава рэспубліканскага маладзёжнага конкурсу "100 ідэй для Беларусі". Тут адбудзецца ўзнагароджанне пераможцаў. Школьнікам і навучэнцам ССНУ і каледжаў будуць уручаны рэкамендацыі Цэнтральнага камітэта ГА "БРСМ" для паступлення ў ВНУ на спецыяльнасці, якія адпавядаюць профілю іх конкурснага праекта. Пераможцы-студэнты атрымаюць запрашэнне прайсці школу "Малады вучоны пад ключ" пры Нацыянальнай акадэміі навук Беларусі. "Усім пераможцам у намінацыях прадастаўляецца магчымасць прыняць удзел у Рэспубліканскім конкурсе інавацыйных праектаў. На падставе рашэння савета дзесяць лепшых аўтарскіх праектаў гарантавана атрымаюць грашовыя сродкі ў памеры да 40 тарыфных ставак для распрацоўкі бізнес-планаў для далейшага ўдзелу ў конкурсе ў парадку і на ўмовах, вызначаных Дзяржаўным камітэтам па навуцы і тэхналогіях", - дадала куратар праекта.

Акрамя таго, партнёры праекта прадаставяць маладым людзям адукацыйную падтрымку і магчымасць прайсці навучальны курс для пачаткоўцаў у бізнесе, сертыфікаты на бясплатнае навучанне ў стартап-акселератары, рэгістрацыю фірмы, размяшчэнне на працягу года на базе бізнес-інкубатара і іншыя бонусы.

Эліна Брага звярнула ўвагу, што зараз у групе "Моладзь Беларусі" у сацыяльнай сетцы ВКонтакте арганізавана галасаванне за лепшы аўтарскі праект. Імя пераможцы па версіі інтэрнэт-карыстальнікаў стане вядома 12 красавіка.

Ідэйным натхняльнікам праекта "100 ідэй для Беларусі" з 2011 года выступае Беларускі рэспубліканскі саюз моладзі.

Навіны Беларусі (БелТА)