3 верасня, Віцебск /Вольга Багачова - БЕЛТА/. У Глыбоцкім раёне лепшых малаказдатчыкаў заахвочваюць даільнымі апаратамі, паведаміў карэспандэнту БЕЛТА галоўны дзяржаўны інспектар па закупках і якасці сельгаспрадукцыі ўпраўлення сельскай гаспадаркі і харчавання Глыбоцкага райвыканкама Уладзімір Хмелеўскі. Ініцыятыва такога заахвочвання належыць старшыні райвыканкама Алегу Мархату. Галоўныя ўмовы прэміравання - утрыманне вялікай (5 і больш) колькасці буйной рагатай жывёлы і рэгулярны продаж прадукцыі дзяржаве. З улікам гэтага першымі ўладальнікамі індывідуальных даільных апаратаў у жніўні сталі сем'і малаказдатчыкаў з вёсак Азерцы і Целешы, у гаспадарках якіх утрымліваецца па пяць кароў, а штогадовы аб'ём прададзенага дзяржаве малака складае па 20 т. Чарговую цырымонію ўзнагароджання лепшых малаказдатчыкаў раёна ў Глыбокім плануецца правесці напярэдадні Новага года. Пакуль жа ва ўпраўленні сельскай гаспадаркі і харчавання райвыканкама вызначаюць найбольш годных з больш чым дзесятка кандыдатур для заахвочвання. Кошт аднаго апарата складае Br6 млн. Абсталяванне набываецца за кошт Глыбоцкага малочна-кансервавага камбіната, на які і паступае ў далейшым сыравіна для далейшай перапрацоўкі, адзначыў Уладзімір Хмелеўскі. Ён таксама дадаў, што ўсяго за мінулы год насельніцтвам было здадзена 7,5 тыс. т малака, што складае 25% ад усяго нарыхтаванага ў раёне. Пры гэтым якасць прыватнай прадукцыі ні ў чым не саступае атрыманай ад сельгаспрадпрыемстваў.-0-

БЕЛТА