9 верасня, Мінск /Таццяна Лобас - БЕЛТА/. Лідарамі ў індывідуальных спаборніцтвах вальшчыкаў лесу XVII адкрытага рэспубліканскага чэмпіянату "Лесаруб-2011" сталі тры беларускія ўдзельнікі. Пра гэта карэспандэнту БЕЛТА паведаміў галоўны суддзя спаборніцтваў, галоўны спецыяліст Мінлясгаса Беларусі Мікалай Патоцкі. Спаборніцтвы праходзяць на базе Лагойскага лясгаса. У іх прымаюць удзел вальшчыкі з Беларусі, Расіі, Украіны, Літвы, Латвіі, Эстоніі, Венгрыі і Фінляндыі. Беларусь прадстаўляюць 50 чалавек. Сёння пераможцам у індывідуальных спаборніцтвах стаў работнік Глубокскага доследнага лясгаса Віцебскага дзяржаўнага вытворчага лесагаспадарчага абласнога аб'яднання (ВДВЛГА) Аляксандр Смехоўскі, які набраў 659 ачкоў з максімальна магчымых 660. Ён зваліў дрэва за 1 см ад устаноўленай вешкі. На другім месцы па колькасці ачкоў (658) - Валерый Баран з гэтага ж лясгаса, які зваліў дрэва за 2 см ад устаноўленай вешкі. Трэці вынік (655 ачкоў) у Паўла Бегунова з Полацкага лясгаса Віцебскага ВДВЛГА. Кожнаму з іх удалося за максімальна кароткі час зваліць бензапілой дрэва пад пэўным вуглом так, каб не быў парушаны ствол і крона суседніх дрэў. Мікалай Патоцкі адзначыў высокі ўзровень падрыхтоўкі беларускіх вальшчыкаў лесу. Ацэньваючы ў цэлым вынікі першага дня спаборніцтваў, ён адзначыў, што добрыя вынікі паказалі вельмі многія ўдзельнікі. "Розніца па ачках ідзе ў сотыя долі, вельмі шчыльныя вынікі, прэтэндэнтаў на перамогу па агульнай суме ачкоў будзе шмат", - рэзюмаваў Мікалай Патоцкі. Да прыкладу, роўную колькасць ачкоў (па 653) набралі прадстаўнік Эстоніі Таві Эрбай і венгр Андрас Козак. Лідар фінскай каманды Юка Перамакі зарабіў 649 ачкоў, а экс-чэмпіён сусветнага чэмпіянату лесарубаў, уладальнік "залатой каскі" лесаруба прадстаўнік расійскай каманды Ілья Швецоў - 612 ачкоў. Па папярэдніх выніках сённяшняга дня спаборніцтваў, першае агульнакаманднае месца заняла каманда Віцебскага ВДВЛГА, на другім месцы - другая каманда Брэсцкага ВДВЛГА (рэгіёны мелі права выстаўляць па дзве каманды), на трэцім месцы - другая каманда Мінскага ВДВЛГА. З гасцей адзначыліся зборныя Венгрыі і Эстоніі, якія адпаведна занялі пятае і шостае месцы ў агульнакамандным заліку па валцы лесу.