Неабходнасць рэканструкцыі, як кажуць, прадыктавала час: АЗС была пабудавана ў 1971 годзе, і за больш чым 40 гадоў эксплуатацыі абсталяванне зносілася, састарэла і фізічна, і маральна.
Неабходнасць рэканструкцыі, як кажуць, прадыктавала час: АЗС была пабудавана ў 1971 годзе, і за больш чым 40 гадоў эксплуатацыі абсталяванне зносілася, састарэла і фізічна, і маральна. Капітальная перабодова пачалася ў чэрвені мінулага года. Вядома, лепельчанам і тым, хто праязджае па трасе, давялося пацярпець некаторыя нязручнасці – адзіная запраўка "Лукойл", якая засталася на дарозе, не спраўлялася з узрослым патокам кліентаў, нямала тут выстройваліся чэргі. Разумеючы гэта, генпадрадная арганізацыя ТАА «Прамэнергабуд» і калегі-субпадрадчыкі пастараліся сціснуць час: будаўніча-мантажныя работы выкананы на два месяцы раней за тэрмін.
І сёння кліентам на шматпаліўнай станцыі з міні-тэрміналам прапануюцца самыя сучасныя паслугі і выгоды. Пры рэканструкцыі прыменены перадавыя тэхналогіі, забяспечаны патрабаванні па ахове навакольнага асяроддзя і энергазберажэнні. Гэта не толькі сучасны заправачны комплекс, але і вельмі запатрабаваны на трасе М3 аб'ект прыдарожнага сэрвісу. Тут можна заправіць транспартны сродак беларускімі нафтапрадуктамі і звадкаваным вуглевадародным газам, у краме самаабслугоўвання, дзе прадстаўлены шырокі асартымент прамысловых і харчовых тавараў і прадугледжана дробнааптовая гандаль нафтапрадуктамі, купіць усё неабходнае ў дарогу, падсілкавацца кіроўцам і пасажырам у пункце грамадскага харчавання, дзе прадугледжваецца рэалізацыя ўласнай прадукцыі. У рэканструкцыю аб'екта ўкладзена амаль 30 мільярдаў рублёў грошай кампаніі.
Гэта другая на Віцебшчыне шматпаліўная АЗС з міні-тэрміналам, якая працуе ў падобным фармаце: першая была ўведзена ў Ліёзне. Але лепельская мае і свае адрозненні. Тут упершыню ў вобласці ўстаноўлена фотаэлектрычная станцыя магутнасцю 10 кілават. Электраэнергія, атрыманая ад сонечных панэляў, дазволіць скараціць выдаткі на эксплуатацыю, а лішкі можна будзе прадаць. Такая ж рэканструкцыя вядзецца на АЗС у Талачыне, дзе будзе прадстаўлены асартымент беларускіх нафтапрадуктаў, звадкаваны вуглевадародны газ, забяспечаны ўвесь пералік неабходных паслуг, будуецца крама, кафэ, гэта значыць таксама ствараецца сучасны аб'ект прыдарожнага сэрвісу.
Пра гэта на ўрачыстым адкрыцці расказалі галоўныя інжынеры РУП «Белнафтахім-Віцебскаблнефцепрадукт» і ААТ «Прамэнергабуд» Сяргей Усаў і Аляксандр Пучкоўскі. Старшыня Лепельскага раённага Савета дэпутатаў Мікалай Місюра ад імя мясцовай улады, лепельчан і ўсіх, хто праязджае па трасе, шчыра падзякаваў за стварэнне знакавага і такога неабходнага гораду і дарозе аб'екта.
А для лепельчан быў падрыхтаваны яшчэ адзін падарунак: адзін з жыхароў горада атрымаў права першым і бясплатна заправіць сваю машыну на новай АЗС. Ім стаў член савета раённай арганізацыі ветэранаў Вялікай Айчыннай вайны і працы Павел Ханяк. Дарэчы, Павел Леанідавіч звярнуў увагу, што ўсе работы выкананы ў фірменным стылі вытворчага аб'яднання «Беларуснафта», гэта значыць, створана сапраўдная прыгажосць.
Акрамя выгодаў для спажыўцоў, паляпшэння якасці абслугоўвання, аб'ект несумненна ўпрыгожыў жылы мікрараён, які будуецца. Нядаўна быў здадзены ў эксплуатацыю 100-кватэрны жылы дом, а цяпер вось горад атрымаў яшчэ адзін выдатны падарунак.
Прысутныя на ўрачыстасці пажадалі калектыву АЗС (пасля рэканструкцыі ён вырас з дзесяці да 17 чалавек) паспяховай працы, а ўсім кліентам -- толькі задавальнення ад паслуг, якія прадстаўляе сёння сучасны заправачны комплекс і аб'ект прыдарожнага сэрвісу ў Лепелі.
Алена Целятко.
На здымках: аўтазаправачная станцыя ў Лепелі аформлена ў фірменным стылі, тут створаны сапраўдная прыгажосць і шматлікія выгоды для кліентаў; права ўрачыста перарэзаць чырвоную стужку на аб'екце, які ўводзіцца пасля рэканструкцыі, было прадастаўлена галоўным інжынерам РУП «Беларуснафта-Віцебскаблнефтапрадукт» і ААТ «Прамэнергабуд» Сяргею Усаву і Аляксандру Пачкоўскаму, а таксама старшыні Лепельскага раённага Савета дэпутатаў Мікалаю Місюру; найшырэйшы выбар прадукцыі ў краме самаабслугоўвання, вядома, у першую чаргу зацікавіў кіроўцаў.
Фота аўтара.