24 жніўня, Віцебск /Дзіяна Курыло - БЕЛТА/. Крымінальная справа ў дачыненні да эксперта, які не правёў дактыласкапію аднаго з абвінавачваных у выбуху ў мінскім метро, перададзена ў Віцебскі абласны суд. Пра гэта паведаміў карэспандэнту БЕЛТА намеснік пракурора Віцебскай вобласці Аляксандр Сідаровіч. Следчым аддзелам пракуратуры Віцебскай вобласці скончана расследаванне крымінальнай справы па абвінавачванні аднаго са супрацоўнікаў органаў унутраных спраў УУС Віцебскага аблвыканкама ў здзяйсненні злачынства, прадугледжанага артыкулам 428 КК РБ "Службовая халатнасць". Гэтая справа непасрэдна звязана са справай, якая была ўзбуджана Генеральнай пракуратурай па арт.289 "Тэрарызм" КК Беларусі. У ходзе папярэдняга расследавання было ўстаноўлена, што 20 студзеня 2009 года ў гарадскім ваенным камісарыяце эксперт УУС Віцебскага аблвыканкама не прыняў меры па правядзенні дактыласкапіі прызыўніка, які падлягаў абавязковаму дзяржаўнаму дактыласкапічнаму ўліку як ваеннаабавязаная асоба. Паверыўшы на слова маладому чалавеку, эксперт прадставіў у асабістую справу прызыўніка даведку аб тым, што той раней прайшоў дактыласкапію і неабходнасці ў яе паўторным правядзенні няма. Пры гэтым супрацоўнік праваахоўных органаў не ўпэўніўся ў праўдзівасці заявы прызыўніка. Такім чынам, эксперт вызваліў яго ад дактыласкапічнага ўліку, і інфармацыя аб ім не была змешчана ў банк дактыласкапічных даных, малады чалавек не быў правераны на датычнасць да выбуху ў Мінску 4 ліпеня 2008 года, што дазволіла яму ў далейшым здзейсніць злачынства на станцыі метро ў Мінску. Адказваючы на пытанне аб тым, чаму не была праведзена праверка даных, пазначаных у даведцы экспертам, намеснік пракурора канстатаваў, што механізм гэтых праверак да гэтага часу належным чынам не быў прапісаны. "Калі ёсць даведка, то мяркуецца, што службовая асоба правяла праверку", - дадаў ён.