30 красавіка, Віцебск /Вольга Багачова - БЕЛТА/. У Віцебску двое міліцыянераў выратавалі дзяўчыну-самагубцу, паведамілі карэспандэнту БЕЛТА ў аддзяленні інфармацыі і грамадскіх сувязяў УУС Віцебскага аблвыканкама. Напярэдадні днём група хуткага рэагавання у складзе старшага сяржанта Івана Образава, Максіма Максімава і сяржанта-кіроўцы Уладзіміра Вілічынскага падчас нясення дзяжурства атрымала паведамленне ад дзяжурнага УУС аб здарэнні на мосце Кірава. Мінакі паведамілі па тэлефоне 102, што маладая дзяўчына скокнула з моста ў раку. Супрацоўнікі міліцыі, якія прыбылі на месца здарэння, змаглі па дарозе ўздоўж ракі дагнаць на машыне дзяўчыну, якую несла цячэнне, а затым выцягнулі яе з вады. Пацярпелая, якая знаходзілася ў нецвярозым стане, аказалася жывая. Аб матывах, якія падштурхнулі да рашэння скончыць жыццё самагубствам, супрацоўнікам міліцыі яна не расказала. Брыгада хуткай дапамогі даставіла 21-гадовую дзяўчыну ў Віцебскую абласную клінічную бальніцу. Дзеянні супрацоўнікаў групы хуткага рэагавання заахвочаны грашовай прэміяй.-0-

БЕЛТА