Больш за 200 арганізацый Віцебшчыны прынялі ўдзел у аглядзе-конкурсе на лепшую арганізацыю работы ў галіне аховы працы ў 2022 годзе.
Гэты агляд-конкурс праходзіць у вобласці з 2008 года. Умовы яго даволі жорсткія. Так, па выніках работы за 2022 год па ахове працы сярод прадпрыемстваў і арганізацый вытворчай і невытворчай сфер дзейнасці да другога этапу рашэннямі гаррайвыканкамаў дайшлі толькі 72 арганізацыі, якія не дапусцілі за мінулы год няшчасных выпадкаў у сваіх калектывах. А сярод пераможцаў і зусім апынуліся нямногія.
Урачыстая цырымонія ўзнагароджання кіраўнікоў такіх калектываў адбылася ў аблвыканкаме. У ёй прынялі ўдзел старшыня Віцебскага аблвыканкама Аляксандр Субоцін і яго намеснік Вячаслаў Дурноў, старшыня камітэта па працы, занятасці і сацыяльнай абароне аблвыканкама Барыс Ефрэмаў, старшыня абласнога аб'яднання прафсаюзаў Юрый Дзеркач, старшыня абласнога саюза наймальнікаў Уладзімір Туравінаў, кіраўнікі кантрольна-наглядных органаў вобласці.
У Віцебску ўзнагародзілі пераможцаў рэгіянальнага агляду-конкурсу на лепшую арганізацыю работы па ахове працы
– Праца любога прадпрыемства ацэньваецца не толькі эканамічнымі паказчыкамі, поспехамі ў мадэрнізацыі, развіцці, будаўніцтве, выкананні тых ці іншых праграм і планаў, але, вядома ж, і тым, як забяспечваецца бяспека працоўнага месца, як культывуецца здаровы лад жыцця працаўнікоў, – адзначыў Аляксандр Субоцін, прывітаўшы прысутных. – Больш таго, менавіта бяспека жыццядзейнасці работнікаў стаіць на першым месцы ў дзейнасці кожнага кіраўніка малога ці буйнога прадпрыемства. Сёння тут – самыя лепшыя, і за тое, што вы забяспечылі сваім калектывам бяспечныя ўмовы працы, вялікі вам дзякуй!
Аляксандр Субоцін уручыў дыпломы «Лепшая арганізацыя Віцебскай вобласці па ахове працы ў 2022 годзе» кіраўнікам чатырох прадпрыемстваў. Пераможцам у намінацыі «Арганізацыя невытворчай сферы» стала філіял «Віцебскгрузсэрвіс» УП «Віцебскае аддзяленне Беларускай чыгункі»; у намінацыі «Арганізацыя вытворчай сферы з колькасцю працаўнікоў да 100 чалавек» узнагароджана казеннае прадпрыемства «Цэнтр утылізацыі авіяцыйных сродкаў паражэння»; у намінацыі «Арганізацыя вытворчай сферы з колькасцю працаўнікоў ад 101 да 500 чалавек» – філіял «Полацкводаканал» УП «Віцебскаблводаканал»; у намінацыі «Арганізацыя вытворчай сферы з колькасцю працаўнікоў звыш 500 чалавек» – УП «ВіцебскаблГаз».
За істотны ўклад у рэалізацыю асноўных напрамкаў дзяржаўнай палітыкі ў галіне аховы працы, захаванне здароўя работнікаў і арганізацыю бяспечнай працы ў 2022 годзе, а таксама за высокі ўзровень культуры аховы працы, увагу да пытанняў бяспекі, прафілактыкі прафзахворванняў і траўматызму на працоўных месцах шэрагу кіраўнікоў устаноў, арганізацый, таварыстваў і прадпрыемстваў былі ўручаны падзячныя лісты старшыні Віцебскага аблвыканкама.
Крыніца: vitebsk-region.gov.by