Асноўны закон краіны трэба пісаць, зыходзячы з прынцыпаў, якія дазволяць развівацца грамадству доўгія гады.
Асноўны закон краіны трэба пісаць, зыходзячы з прынцыпаў, якія дазволяць развівацца грамадству доўгія гады. Такое меркаванне падчас дыялогавай пляцоўкі ў Віцебскім дзяржуніверсітэце імя П.М. Машэрава выказаў дэпутат Палаты прадстаўнікоў, кандыдат юрыдычных навук Аляксей Ягораў.
Паводле яго слоў, Канстытуцыя – найважнейшы дакумент, які цэментуе правы і абавязкі ў любым грамадстве. Таму асноўны закон трэба рэфармаваць не пад палітычную абстаноўку і абдумліва вырашыць, як пераразмеркаваць паўнамоцтвы паміж дзяржда органамі і галінамі ўлады. "Важна, каб Канстытуцыя адлюстроўвала прынцыпы, якія дазволяць нармальна развівацца грамадству на доўгія гады", - адзначыў Аляксей Ягораў.
Ён таксама выказаў ідэю на час працы над зменамі ў асноўны закон стварыць шырокамаштабную структуру ў выглядзе Канстытуцыйнай рады, якая будзе ўключаць юрыстаў, прадстаўнікоў грамадскіх аб'яднанняў і палітычных партый. "Таму што рабочая група ў асноўным займаецца адточваннем тых норм, тонкасцей, нязгоднасцей, якія праніклі ў праект канстытуцыйных змен падчас абмеркаванняў. Канстытуцыйная рада ж павінна выпрацоўваць доктрыны", - сказаў дэпутат і дадаў, што на дыялогавых пляцоўках трэба шукаць кампрамісныя ідэі.
Намеснік старшыні Віцебскага аблвыканкама Уладзімір Пянін падкрэсліў, што ідэі змен у Канстытуцыю павінны пісаць прафесіяналы-юрысты. Трэба як мага больш размаўляць з людзьмі, дыскутаваць і разумець, што будуць розныя меркаванні, і іх улічваць. Паводле яго слоў, чым шырэйшым будзе дыялог, тым больш згуртаваным будзе грамадства.
У Віцебскім дзяржаўным універсітэце прайшла дыялогавая пляцоўка. У ёй прынялі ўдзел прадстаўнікі ўлады і грамадскіх аб'яднанняў, дэпутаты парламента, сенатары. Бакі абмеркавалі тэмы і прапановы з рэгіёнаў, якія паступілі па выніках дыялогавых пляцовак. Удзельнікі сустрэчы падсумавалі, што пераўтварэнні павінны ісці эвалюцыйным шляхам. Таксама эксперты звярнулі ўвагу: калі над праектам змен у асноўны закон пачне працаваць рабочая група, у гэтым працэсе павінна быць максімальная адкрытасць.