7 снежня, Віцебск /Вольга Багачова - БЕЛТА/. У Віцебскай вобласці дзейнічае 300 таварыстваў уласнікаў, паведаміў карэспандэнту БЕЛТА начальнік упраўлення жыллёва-камунальнай гаспадаркі Віцебскага аблвыканкама Юрый Дзядзела. Жыллёвы фонд Віцебскай вобласці складае 30,9 млн. кв. м, у тым ліку 14,2 млн. кв. м знаходзіцца на тэхнічным абслугоўванні 29 прадпрыемстваў жыллёва-камунальнай гаспадаркі. Частка жылфонду абслугоўваецца прадпрыемствамі і арганізацыямі па ведамаснай прыналежнасці. Па стане на 1 верасня, у рэгіёне зарэгістравана 300 таварыстваў уласнікаў. З іх 86 для тэхнічнага абслугоўвання карыстаюцца паслугамі прадпрыемстваў ЖКГ. Астатнія 214 ажыццяўляюць тэхнічнае абслугоўванне жылля самастойна. Для гэтага ў іх набраны штат работнікаў, які ўключае дворніка, сантэхніка, электрыка і інш. Пры неабходнасці на дагаворнай аснове прыцягваюцца іншыя спецыялісты. Акрамя таго, у рэгіёне зарэгістравана дзве асацыяцыі таварыстваў уласнікаў - "Віцебская альтэрнатыва" і "Юнацтва-Орша", якія ўключаюць некалькі размешчаных побач жылых дамоў. Іх таварыствы ўласнікаў аб'ядналіся ў асацыяцыі для калегіяльнага вырашэння пытанняў, якія закранаюць сумежныя інтарэсы суседніх дамоў. Напрыклад, добраўпарадкаванне прыдамавой тэрыторыі і г.д. "Скарг або зваротаў з нараканнямі ад насельніцтва з нагоды дзейнасці іх таварыстваў уласнікаў ва ўпраўленне не паступала. І прапаноў ад грамадзян, якія ўваходзяць у таварыствы ўласнікаў, аб зваротным пераходзе на тэхабслугоўванне прадпрыемстваў ЖКГ таксама не было. Гэта сведчыць аб тым, што дадзеная форма працы апраўдвае сябе", - адзначыў Юрый Дзядзела, падкрэсліўшы, што бягучыя пытанні, вядома, ёсць, але ўсе яны вырашаюцца ў працоўным парадку. Прыватных кампаній у Віцебскай вобласці, якія працуюць у сферы тэхнічнага абслугоўвання жыллёвага фонду, няма.