У Віцебскай вобласці найбольшую актыўнасць пры галасаванні ў асноўны дзень яўкі праявілі вяскоўцы.
У Віцебскай вобласці найбольшую актыўнасць пры галасаванні ў асноўны дзень яўкі праявілі вяскоўцы. Пра гэта паведаміў сёння на брыфінгу старшыня Віцебскай абласной выбарчай камісіі Дзмітрый Хома."Традыцыйна найбольш актыўнымі ў дзень выбараў былі жыхары сельскіх раёнаў вобласці. У лідарах - Бешанковіцкі, Докшыцкі, Дубровенскі, Лёзненскі, Россонскі і Талачынскі раёны, дзе яўка выбаршчыкаў склала 90% і вышэй. Усяго ў галасаванні прынялі ўдзел 702 577 чалавек з 849 610 выбаршчыкаў, уключаных у спісы. Агульная яўка дасягнула 82,69%. У Віцебску - больш за 76%", - канстатаваў Дзмітрый Хома.
Старшыня аблвыбаркама падкрэсліў, што на дадзены момант аперыруе папярэднімі вынікамі галасавання: "Гэта папярэднія дадзеныя. Больш дакладныя будуць падведзены пасля прыёму пратаколаў у Віцебскай абласной выбарчай камісіі і правядзення пасяджэння абласной камісіі".
Па яго словах, палітычная кампанія ў рэгіёне прайшла спакойна, на высокім арганізацыйным узроўні. Усе ўчасткі былі сур'ёзна падрыхтаваны, забяспечаны сродкамі індывідуальнай абароны, выконваліся ўсе рэкамендацыі. Пік яўкі выбаршчыкаў прыйшоўся на 10.00-13.00. Аднак у цэлым па часе людзі прыходзілі дастаткова раўнамерна на працягу ўсяго дня.
Закранаючы звароты грамадзян, Дзмітрый Хома адзначыў, што істотных парушэнняў не зафіксавана. Вялікая колькасць званкоў была ад пажылых людзей з нагоды магчымасці прагаласаваць на даму і ад выбаршчыкаў, якія звярталіся з пытаннем рэалізаваць сваё грамадзянскае права не па месцы жыхарства. Усе гэтыя пытанні вырашаліся аблвыбаркамам па меры паступлення. Мелі месца таксама адзінкавыя спробы правакацый, якія не паўплывалі на працу выбарчых камісій.
"У цяперашні час абласная выбарчая камісія працягвае працаваць і акумуляваць інфармацыю. Выніковае пасяджэнне плануецца правесці 12 жніўня", - дадаў Дзмітрый Хома.