9 кастрычніка, Віцебск /Вольга Багачова - БЕЛТА/. Лаўрэаты прэміі імя З.Туснолобовай-Марчанкі вызначаны ў Віцебскай вобласці, паведамілі карэспандэнту БЕЛТА ў камітэце па працы, занятасці і сацыяльнай абароне насельніцтва Віцебскага аблвыканкама. Сярод узнагароджаных – прадстаўніцы ўсіх рэгіёнаў вобласці, якія працуюць у розных прафесіях. Сярод іх – бацькі-выхавальнікі дзіцячага дома сямейнага тыпу, прыёмныя бацькі, настаўнікі, рабочыя Аршанскага льнокамбіната, ААТ "Лантан", Верхнядзвінскага масласырзавода, папяровай фабрыкі "Чырвоная зорка", хатнія гаспадыні, супрацоўнікі ўстаноў культуры, аховы здароўя і іншых сфер. Адказныя, дысцыплінаваныя і працавітыя на працы, гэтыя жанчыны з'яўляюцца выдатным прыкладам і дома, дзе ў якасці маці гэтак жа паспяхова праяўляюць усе свае лепшыя якасці ў выхаванні дзяцей. У якасці прыкладу моцнай і дружнай сям'і, дзе жанчына філігранна сумяшчае працу і дом, у камітэце прывялі прадстаўніцу Браслаўскага раёна: 35-гадовая выхавальніца Ахрэмаўскага дзіцячага садка Ала Антонашчык, якая выхоўвае з мужам траіх дзяцей дашкольнага і школьнага ўзросту, карыстаецца заслужаным аўтарытэтам у бацькоў выхаванцаў дзіцячага садка і калектыву. Дома ж яна неўтаймаваная гаспадыня, якая разам з астатнімі членамі сям'і пастаянна прымае ўдзел у школьных спартландыях, грамадскіх праектах ("Уладар сяла", "Найлепшая шматдзетная сям'я Віцебшчыны-2012"), якія папулярызуюць сямейныя каштоўнасці. Цырымонія ўзнагароджання жыхарак Прыдзвіння прэміяй імя З.Туснолобовай-Марчанкі і ордэнам Маці адбудзецца 12 кастрычніка ў Віцебскім аблвыканкаме. На святочнае мерапрыемства ўладальніцы высокіх узнагарод запрошаны разам з дзецьмі. Прэмія імя Героя Савецкага Саюза З.М.Туснолобовай-Марчанкі заснавана Віцебскім аблвыканкамам па ініцыятыве Савета жанчын у мэтах павышэння прэстыжу мацярынства і ўмацавання інстытута сям'і. Узнагарода прысуджаецца штогод у кастрычніку 27 жанчынам рэгіёна вобласці за высокі маральны прыклад ва ўмацаванні сям'і і выхаванні дзяцей, устанаўленні і падтрыманні гарманічных сямейных адносін. Усяго за гэты час такой узнагароды ўдастоены 322 жыхаркі рэгіёна (уключаючы цяперашніх лаўрэатак).