У віцебскай гімназіі № 8 у займальнай гульнявой форме прайшла прафілактычная акцыя «Бяспека – гэта…». Героямі дня сталі першакласнікі. Многія з іх яшчэ не ведаюць, як уключыць газавую пліту, таму веды аб бяспецы ў працы з газавым абсталяваннем для іх своечасовыя і неабходныя. Тым больш, што набываюцца яны ў форме квеста, гульняў і ўзнагароджваюцца салодкімі падарункамі.
Вучаніца 1 «А» класа Ксюша Белавусава адной з першых прайшла ўсе заданні квеста і падзялілася сваімі ўражаннямі ад цікавых выпрабаванняў:
– Самым цяжкім для мяне быў конкурс, дзе трэба было выявіць шланг, машынку, а самым лёгкім – вызначыць, адкуль ідзе пах газу. Мне ўсё вельмі спадабалася.
Для таго, каб свята атрымалася, давялося нямала папрацаваць яго арганізатарам – УП «Віцебскаблгаз» і філіялу Дзяржэнергагазнагляду па Віцебскай вобласці. Падобная акцыя праводзіцца ў рэспубліцы ўпершыню і накіравана на прафілактыку бяспечнага выкарыстання электра- і цеплаўстановак, а таксама газавага абсталявання напярэдадні восеньска-зімовага перыяду.
– З гімназіяй №8 у нас падпісана дарожная карта аб супрацоўніцтве, – расказала намеснік генеральнага дырэктара па ідэалагічнай рабоце і сацыяльных пытаннях УП «Віцебскаблгаз» Святлана Волкава. – У нас ёсць інжынерныя класы, і мы не першы раз тут у гасцях, а старшакласнікі бывалі на прадпрыемстве.
Цяпер мы вырашылі папярэдзіць першакласнікаў. Ім трэба не толькі расказаць аб бяспецы, але і паказаць, пагуляць. І з імі гуляюць нашы супрацоўнікі, а не запрошаныя з боку акцёры. Усё, што мы прэзентуем, гэта распрацоўкі «Віцебскаблгаза».
– Цяпер Міністэрства энергетыкі праводзіць акцыю «Бяспека - гэта...», і ўсе арганізацыі, якія ўваходзяць у Міністэрства энергетыкі, далучыліся да яе, – адзначыў дырэктар філіяла Дзяржэнергагазнагляду па Віцебскай вобласці Андрэй Васілеўскі. – Мы павінны расказаць дзецям аб небяспеках, якія іх могуць падсцерагаць пры выкарыстанні электра-, цепла- і газавых прыбораў.
У першакласнікаў была унікальная магчымасць пазнаёміцца з тэхналогіямі будучыні. Спецыялісты вытворчага ўпраўлення «АйЦіГаз» на базе УП «Віцебскаблгаз» пераносілі малышоў у віртуальны свет, дэманстравалі сабаку-робата і іншыя сучасныя распрацоўкі, якія робяць выкарыстанне газу яшчэ больш бяспечным і эфектыўным.
Дзеці загадзя рыхтаваліся да гэтага мерапрыемства. На працягу месяца яны малявалі бяспечны дом, праводзілі конкурсы ўнутры сваіх класаў. У выніку было абрана 16 лепшых работ, якія і сталі пераможцамі.
Пасля інтэрактыўнай праграмы дзяцей чакаў спектакль з роставымі лялькамі, прыдуманы і пастаўлены работнікамі прадпрыемства. Ні адно дзіця не сышло са свята без падарунка і добрага настрою.