20 снежня, Віцебск /Дзіяна Курыла - БЕЛТА/. Папскі савет пастырства работнікаў сферы аховы здароўя праінфармаваў упраўленне аховы здароўя Віцебскага аблвыканкама аб сваім удзеле ў інвестыцыйным праекце па пашырэнні і ўмацаванні матэрыяльна-тэхнічнай базы Браслаўскага абласнога падлеткавага туберкулёзнага рэабілітацыйнага цэнтра, паведаміў карэспандэнту БЕЛТА начальнік упраўлення аховы здароўя Віцебскага аблвыканкама Юрый Дзеркач. Як сказана ў лісце, які прыйшоў у Віцебскі аблвыканкам, Ватыкан мае намер у 2012 годзе вылучыць сродкі на будаўніцтва новых жылых і лячэбных карпусоў цэнтра, а таксама на набыццё абсталявання. Сафінансаванне прадугледжваецца весці на парытэтнай аснове. Рэалізацыя гэтага праекта дазволіць удвая з 50 да 100 павялічыць колькасць месцаў у рэабілітацыйным цэнтры, стварыць камфортныя ўмовы для аднаўлення хворых падлеткаў. Пры гэтым, палову месцаў бясплатна будуць атрымліваць беларускія юнакі і дзяўчаты, астатнія будуць размяркоўвацца сярод юных грамадзян іншых еўрапейскіх дзяржаў. Іх рэабілітацыя будзе ажыццяўляцца за плату. Браслаўскі рэабілітацыйны цэнтр быў створаны ў 1946 годзе. У цяперашні час цэнтр з'яўляецца спецыялізаванай лячэбна-прафілактычнай установай у сістэме аховы здароўя Рэспублікі Беларусь для круглагадовага лячэння і медыцынскай рэабілітацыі падлеткаў з захворваннем туберкулёзам органаў дыхання, правядзення хіміпрафілактыкі і прэвентыўнага лячэння тубінфікаваным і падлеткам з тубкантактаў, ізаляцыі падлеткаў з тубвогнішчаў. Адначасова тут могуць атрымліваць дапамогу 50 юнакоў і дзяўчат ва ўзросце 14-17 гадоў.-0-

БЕЛТА