Каля вёскі Вішні Лёзненскага раёна адбыліся жалобны мітынг і ўрачыстае перапахаванне астанкаў 15 вайскоўцаў Рабоча-сялянскай Чырвонай арміі, якія загінулі ў гады Вялікай Айчыннай вайны.
Астанкі воінаў і супутныя прадметы рыштунку і амуніцыі былі знойдзены падчас пошукавых работ на тэрыторыі Бабінавіцкага сельскага Савета 52-м спецыялізаваным пошукавым батальёнам Міністэрства абароны Рэспублікі Беларусь сумесна з членамі пошукавых аб'яднанняў. На жаль, устанавіць імёны воінаў не ўдалося.
Каб ушанаваць памяць загінулых, на воінскіх пахаваннях № 4359 сабраліся прадстаўнікі абласной і раённай улады, пошукавікі, прадстаўнікі грамадскіх аб'яднанняў, прадпрыемстваў, школьнікі і мясцовыя жыхары.
– Больш за 80 гадоў наша краіна жыве пад мірным чыстым небам. Але кожнае пакаленне беларусаў памятае і заўсёды будзе памятаць, якой цаной нам дасталіся мір і Вялікая Перамога савецкага народа ў Вялікай Айчыннай вайне. Гэта мільёны маладых жыццяў салдат, якія мужна ўсталі на абарону Радзімы. З пакалення ў пакаленне перадаецца гістарычная праўда, пра тыя жахі, якія прынесла нашаму народу фашысцкая акупацыя. Колькі пакут гора слёз і крыві было праліта на нашай зямлі! І тым важнейшы подзвіг савецкіх салдат, чырвонаармейцаў, – адзначыў старшыня абласнога Савета дэпутатаў Дзмітрый Дзямідаў. – Сёння мы перапахаваем астанкі 15 чырвонаармейцаў, якія тут, на тэрыторыі Лёзненскага раёна, змагаліся за нашу з вамі свабоду, жыццё. Маладыя хлопцы не шкадавалі сябе дзеля перамогі над праклятым ворагам, дзеля таго, каб мы маглі жыць, гадаваць дзяцей, выхоўваць іх у свабоднай і незалежнай краіне. Захаванне гістарычнай памяці, правядзенне работ па ўшанаванні памяці герояў – адна з ключавых асноў дзяржпалітыкі нашай краіны. Мы павінны працягваць працу па пошуку астанкаў, усталяванні імёнаў загінулых. На жаль, мы не ведаем, хто былі гэтыя 15 чырвонаармейцаў, як іх звалі, адкуль яны прызываліся. Але мы дакладна ведаем, што яны выканалі свой доўг да канца, змагаліся і загінулі з гонарам, зрабіўшы ўсё, каб наблізіць доўгачаканую Перамогу. Сёння яны вяртаюцца з бою, знаходзяць супакаенне ў брацкай магіле. А праца па пошуку невядомых герояў і іх ушанаванню будзе працягнута.
Старшыня дэпутацкага корпуса выказаў словы падзякі ўсім, хто браў удзел у пошукавай працы: пошукавікам, грамадскім аб'яднанням і вайскоўцам. Ён адзначыў таксама, што ў адрозненне ад краін Захаду і Украіны, якія сёння ваююць з гістарычнай памяццю, спрабуючы знішчыць праўду пра подзвіг савецкіх салдат, беларусы шануюць і перадаюць памяць з пакалення ў пакаленне.
Удзельнікі мерапрыемства ўшанавалі памяць загінулых хвілінай маўчання і ўсклалі вянкі і кветкі на брацкую магілу.
vitebsk-region.gov.by
