5 снежня, Віцебск /Дзіяна Курыло - БЕЛТА/. Напярэдадні калядных і навагодніх святаў верхнядзвінскія сыраробы паставілі ў гандлёвыя сеткі першыя партыі сыроў тыпу мацарэла і рыкота, паведамілі карэспандэнту БЕЛТА ў ААТ "Верхнядзвінскі масласырзавод". Выпуск новага імпартазамяшчальнага прадукту асвоіла сумесны таварыства з абмежаванай адказнасцю "Верхні луг", заснавальнікамі якога сталі ААТ "Верхнядзвінскі масласырзавод" і расійскае ТАА "Краун Трэйдынг" - адзін з буйных трэйдараў малочнай прадукцыі беларускай вытворчасці на расійскім рынку. Спецыялізацыяй новага прадпрыемства з'яўляецца выпуск мяккіх сыроў. Заснавальнікі набылі найноўшае абсталяванне вытворчасці Францыі і Італіі, аналагаў якому ў Беларусі пакуль няма. Прадукцыйнасць абсталявання складае 3 т у гадзіну. Увесь працэс вытворчасці аўтаматызаваны, а ход тэхналагічнага працэсу адлюстроўваецца на маніторы. Як адзначылі на прадпрыемстве, працэс вытворчасці сыроў тыпу мацарэла асвоены верхнядзвінскімі сыраробамі пры ўдзеле італьянскіх спецыялістаў, якія высока ацанілі прафесіяналізм сваіх беларускіх калег. Верхнядзвінскую мацарэлу ў адпаведнасці з італьянскай тэхналогіяй вырабляюць з пастэрызаванага малака вышэйшага гатунку або класа "экстра" шляхам каагуляцыі натуральным ферментным прэпаратам, з прымяненнем бактэрыяльных заквасак. У цяперашні час на прадпрыемстве вырабляюць сыр тыпу мацарэла-чыльеджы і сыр тыпу мацарэла-боккончы, якія прапануюцца ў выглядзе сырных шарыкаў у расоле. Разам з мацарэлай асвоена вытворчасць малочнага прадукту тыпу рыкота, у вырабе якога ўжываецца сыроватка, якая засталася пасля вытворчасці мацарэлы. У бліжэйшы час на прылаўках з'явяцца паўцвёрдыя сыры тыпу мацарэла-скаморца, а таксама сыры тыпу чэчыл. Каля 80% прадукцыі "Верхняга луга" будзе пастаўляцца на экспарт.-0-

БЕЛТА