23 мая, Мінск /Алена Прус - БЕЛТА/. Ветэраны Вялікай Айчыннай вайны атрымаюць матэрыяльную дапамогу да 70-годдзя вызвалення Беларусі і 70-годдзя Перамогі. Гэта прадугледжана Планам падрыхтоўкі і правядзення мерапрыемстваў па святкаванні 70-й гадавіны вызвалення Рэспублікі Беларусь ад нямецка-фашысцкіх захопнікаў і Перамогі савецкага народа ў Вялікай Айчыннай вайне, зацверджаным указам Прэзідэнта ад 20 мая 2013 года №230. Дакумент афіцыйна апублікаваны сёння на Нацыянальным прававым інтэрнэт-партале, паведамляе карэспандэнт БЕЛТА.
Так, праект указа "Аб аказанні аднаразовай матэрыяльнай дапамогі ветэранам Вялікай Айчыннай вайны і асобным катэгорыям грамадзян, пацярпелых ад наступстваў вайны, у сувязі са святкаваннем 70-й гадавіны вызвалення Рэспублікі Беларусь ад нямецка-фашысцкіх захопнікаў" павінен быць падрыхтаваны да 1 сакавіка 2014 года. Другі праект указа - аб аказанні аднаразовай матэрыяльнай дапамогі ў сувязі са святкаваннем 70-й гадавіны Перамогі - да 1 сакавіка 2015 года.
Акрамя таго, будзе арганізавана ўручэнне ветэранам памятных падарункаў за кошт сродкаў мясцовых бюджэтаў, юрыдычных асоб, у тым ліку грамадскіх аб'яднанняў (да 3 ліпеня 2014 года і да 9 мая 2015 года).
Планам прадугледжана вывучэнне сацыяльна-бытавых умоў жыцця ветэранаў ВАВ, членаў сем'яў вайскоўцаў, партызан і падпольшчыкаў, якія загінулі (памерлі) у гады вайны, асобных катэгорый грамадзян, пацярпелых ад наступстваў вайны. Пры неабходнасці будуць адрамантаваны кватэры і дамы адзінокіх грамадзян гэтых катэгорый за кошт сродкаў мясцовых бюджэтаў. У межах акцый "Ваша Перамога - наша свабода", "Добрае Сэрца" - ветэранам!" цімураўскія і моладзевыя валанцёрскія атрады ў 2013-2015 гадах акажуць шэфскую дапамогу.
Запланавана правядзенне комплексных медаглядаў, аказанне медыцынскай дапамогі ветэранам ВАВ у дзяржаўных арганізацыях аховы здароўя.
Інвалідам і ўдзельнікам ВАВ 1-5 ліпеня 2014 года і 7-11 мая 2015 года будзе прадастаўлена права бясплатнага карыстання паслугамі стацыянарнай тэлефоннай сувязі на тэрыторыі рэспублікі за кошт сродкаў РУП "Белтэлекам", а таксама з прымяненнем сэрвісных тэлефонных карт.
2 ліпеня 2014 года адбудзецца урачыстае адкрыццё новага будынка і экспазіцыі Беларускага дзяржаўнага музея гісторыі Вялікай Айчыннай.
Сярод ваенна-мемарыяльных мерапрыемстваў – рамонт і добраўпарадкаванне мемарыялаў і помнікаў воінскай славы, надмагільных збудаванняў на воінскіх пахаваннях; правядзенне рэспубліканскіх суботнікаў, атрыманыя сродкі ад якіх накіроўваюцца на рамонт і добраўпарадкаванне воінскіх пахаванняў ВАВ; выраб надмагільных пліт і нанясенне на іх устаноўленых імёнаў воінаў, загінулых пры абароне Айчыны. Будзе праведзена Вахта памяці для актывізацыі архіўна-даследчай работы па ўстанаўленні імёнаў, лёсаў і месцаў пахаванняў загінулых у гады вайны, прадугледжваецца адкрыццё новых памятных месцаў, стварэнне мемарыяльных зон. Працягнуцца пошукавыя работы з мэтай выяўлення і лакалізацыі няўлічаных пахаванняў загінулых пры абароне Айчыны і ахвяр Вялікай Айчыннай вайны.
Будуць унесены прапановы аб заснаванні, вырабе і ўручэнні ветэранам ВАВ, былым вязням фашысцкіх канцлагераў, турмаў, гета і былым непаўналетнім вязням іншых месцаў прымусовага ўтрымання, створаных фашыстамі і іх саюзнікамі ў гады Другой сусветнай вайны, іншым катэгорыям грамадзян юбілейнага медаля "70 год вызвалення Беларусі ад нямецка-фашысцкіх захопнікаў". Акрамя таго, прадугледжваецца ўнясенне прапаноў аб вырабе і ўручэнні заснаваных рашэннем Савета кіраўнікоў дзяржаў Садружнасці Незалежных Дзяржаў адзіных юбілейных узнагарод: ганаровага ордэна "70 гадоў Перамогі ў Вялікай Айчыннай вайне 1941-1945 гадоў", юбілейнага медаля "70 гадоў Перамогі ў Вялікай Айчыннай вайне 1941-1945 гадоў".
Як паведамляла БЕЛТА, указам зацверджаны склад рэспубліканскага арганізацыйнага камітэта па святкаванні гэтых дзвюх найважнейшых памятных дат пад старшынствам прэм'ер-міністра Міхаіла Мясніковіча. У аргкамітэт увайшлі кіраўнікі і прадстаўнікі рэспубліканскіх і мясцовых дзяржаўных органаў, сродкаў масавай інфармацыі, Беларускага грамадскага аб'яднання ветэранаў, Беларускага рэспубліканскага саюза моладзі, Федэрацыі прафсаюзаў Беларусі, Добраахвотнага таварыства садзейнічання арміі, авіяцыі і флоту, Беларускага саюза афіцэраў, Беларускага саюза ветэранаў вайны ў Афганістане, іншых арганізацый.
Паводле звестак Міністэрства працы і сацыяльнай абароны, на 1 красавіка бягучага года ў краіне пражываюць 25 тыс. 312 ветэранаў Вялікай Айчыннай вайны. Сярод 17 тыс. 685 удзельнікаў Вялікай Айчыннай вайны 4 тыс. 823 чалавекі з'яўляюцца інвалідамі вайны першай і другой груп. На 1 красавіка гэтага года ў рэспубліцы налічвалася 6 тыс. 394 чалавекі, узнагароджаных ордэнамі або медалямі СССР за самаадданую працу і бездакорную вайсковую службу ў тыле ў гады вайны, а таксама 402 - якія працавалі на аб'ектах проціпаветранай абароны, будаўніцтве абарончых збудаванняў, прыфрантавых участках чыгуначных і аўтамабільных дарог, членаў экіпажаў суднаў, інтэрніраваных у пачатку ВАВ у партах іншых дзяржаў. У Беларусі на 1 красавіка было 103 чалавекі, якія прымалі ўдзел у складзе спецыяльных фарміраванняў у размініраванні тэрыторый і аб'ектаў пасля вызвалення ад нямецкай акупацыі ў 1943-1945 гадах. У краіне жывуць 728 чалавек, якія працавалі на прадпрыемствах, ва ўстановах і арганізацыях Ленінграда ў перыяд блакады і ўзнагароджаных медалём "За абарону Ленінграда", а таксама знакам "Жыхару блакаднага Ленінграда". Акрамя таго, у Беларусі налічваецца 941 інвалід з дзяцінства з прычыны ранення, контузіі, калецтва, звязаных з баявымі дзеяннямі ў перыяд Вялікай Айчыннай вайны альбо з іх наступствамі. Членамі сем'яў загінуўшых воінаў і партызан з'яўляюцца 1 тыс. 732 чалавекі. Былымі вязнямі фашысцкіх канцлагераў, турмаў, гета і іншых месцаў прымусовага ўтрымання прызнаны 31 тыс. 549 жыхароў рэспублікі.-0-