30 красавіка, Віцебск /Вольга Багачова - БЕЛТА/. Глыбоцкая грамада сёння пачне ўвасабляць сваю мару - у горадзе, які прэтэндуе на званне вішнёвай сталіцы Беларусі, адбудзецца першая закладка вішнёвага саду, паведамілі карэспандэнту БЕЛТА ў Глыбоцкім райвыканкаме.
Самая хвалюючая падзея сёлетняй вясны збярэ глыбочан на полацкім напрамку ў раёне вуліцы М.Горкага. Прадстаўнікі мясцовых органаў улады, прадпрыемстваў, арганізацый, грамадскіх аб'яднанняў, Савета старэйшын, лаўрэаты розных гадоў звання "Чалавек года Віцебшчыны", лепшыя педагогі і навучэнцы, а таксама ўсе іншыя жыхары райцэнтра пасадзяць больш за 1 тыс. саджанцаў. Частка з іх сарту "Сіянец №1" спецыяльна адаптавана пад мясцовыя землі. Разам з гэтым многія прынясуць маладыя дрэўцы з уласных прысядзібных участкаў, бо, мабыць, не знойдзецца ў Глыбокім жыхара, які б не вырошчваў вішню. Такім чынам, гарадская акцыя набывае для кожнага яе ўдзельніка і асабісты характар, а пасаджанае дрэва становіцца фактычна іменным.
У Глыбокім маюць намер 30 красавіка закласці вішнёвы сад плошчай каля 1,5 га. Аднак ужо ў бліжэйшыя дні яна павялічыцца ў разы: у планах глыбочан намечана пасадзіць вішнёвы сад і на мінскім напрамку, дзе для гэтага ёсць прыдатны 1 га зямлі, упрыгожыць дрэвамі зялёныя астраўкі ўздоўж гарадскіх вуліц, вытворчых тэрыторый, школ, дамоў, аб'ектаў сацыяльнай сферы, адміністрацыйных будынкаў. Няма сумненняў, што вішнёвае натхненне з касмічнай хуткасцю распаўсюдзіцца ў найбліжэйшы час і па ўсіх іншых населеных пунктах раёна, упэўнены ў райвыканкаме.
Закладка вішнёвага саду - толькі частка велізарнага плана па правядзенні ў Глыбокім вішнёвага фестывалю, з ініцыятывай якога выступіў летась аддзел фізічнай культуры, спорту і турызму райвыканкама. На рэспубліканскім конкурсе творчых работ па прасоўванні гарадоў і рэгіёнаў Беларусі ў рамках III Міжнароднага форуму "Імідж Рэспублікі Беларусь: час дзейнічаць" праект глыбачан "Вішнёвы фестываль" заняў другое месца. У якасці ўзнагароды прызёр міжнароднага фестывалю рэкламы "Канскія львы" рэкламнае агенцтва "Крынь" распрацавала для праекта чатыры варыянты глыбоцкага вішнёвага брэнда. Выбар
Тэрміны правядзення вішнёвага фестывалю ўжо вызначаны: сваіх шматлікіх гасцей ён збярэ з 21 па 27 ліпеня. Цяпер у райцэнтры вядзецца фарміраванне праграмы, якая будзе ўключаць кулінарнае шоу, забаўляльныя праграмы з вішнёвым падтэкстам, а галоўнай падзеяй стане вішнёвая кірмаш.
На Віцебшчыне ўсе добра ведаюць, што цяжка адшукаць вішні смачнейшыя за глыбокскія. Калісьці вішнёвыя сады ў Глыбоцкім раёне заклаў мясцовы памешчык-селекцыянер Лапер, які прывозіў саджанцы з Польшчы. Менавіта з яго садоў сакавітая, салодкая і зімаўстойлівая вішня ступіла спачатку ў тутэйшыя сялянскія сядзібы, а потым распаўсюдзілася па ўсім краі. Дагэтуль вішнёвая слава Глыбокага перадаецца з вуснаў у вусны і ў дні збору ўраджаю прыцягвае ў мястэчка нямала запасливых гаспадароў.
Варта адзначыць, што вішню любяць усюды, таму і вішнёвыя фестывалі праводзяць у многіх краінах: у ЗША такіх фестываляў два - у Вашынгтоне і Трэверс-Сіці, у Харватыі вішнёвай сталіцай лічыцца Лоўран, у Літве - мястэчка Жагары, а ў Расіі - Уладзімір.-0-