9 кастрычніка, Віцебск /Дзіяна Курыло - БЕЛТА/. Віцебск прапануе Харбіну арганізаваць сумесную вытворчасць па выпуску святлодыёднай тэхнікі. Пра гэта сёння на сустрэчы з кітайскімі тэлежурналістамі паведаміў старшыня Віцебскага гарвыканкама Віктар Мікалайкін, перадае карэспандэнт БЕЛТА. Віцебскі гарвыканкам, харбінскія ўлады і кіраўніцтва Харбінскай зоны развіцця некалькі месяцаў таму разгледзелі магчымасць стварэння ў Віцебску вытворчасцей з удзелам кітайскага капіталу, у тым ліку вытворчасць па выпуску святлодыёдаў і святлодыёднай тэхнікі. Пратакол намераў пачаў рэалізоўвацца, і цяпер супрацоўніцтва выходзіць на ўзровень канкрэтных прадпрыемстваў, падкрэсліў Віктар Мікалайкін. Так, у якасці партнёра з беларускага боку ў выпуску святлодыёднай тэхнікі гатова выступіць прыватнае унітарнае прадпрыемства "Элект" АА "БелТІЗ", якое мае дастатковыя тэхнічныя і вытворчыя магчымасці для арганізацыі такой вытворчасці. У межах дасягнутых дамоўленасцей Харбінскай зоне тэхніка-эканамічнага развіцця накіравана інфармацыя аб названым прадпрыемстве з запрашэннем вытворцаў святлодыёднай тэхнікі кітайскага боку наведаць Віцебск і азнаёміцца з патэнцыялам прадпрыемства. Яшчэ адзін сумесны праект маюць намер рэалізаваць прававая група "Закон і парадак" і адміністрацыя Харбінскай зоны тэхніка-эканамічнага развіцця. Гэтыя кампаніі аб'ядналі намаганні па вывучэнні магчымасці адкрыцця ў Віцебску парка інфармацыйных і інавацыйных тэхналогій. Віктар Мікалайкін перакананы, што гэтыя праекты ажыццявяцца і стануць асновай для далейшага эканамічнага партнёрства двух гарадоў-пабрацімаў. Пагадненне аб супрацоўніцтве паміж Віцебскам і Харбінам было падпісана ў 2009 годзе, дагавор аб пабрацімскіх сувязях быў заключаны ў студзені 2012 года і лёг у аснову для ажыццяўлення наступных кантактаў у розных сферах. Знешнегандлёвы абарот Віцебска з Кітаем за студзень-ліпень 2012 года склаўся на ўзроўні $63 млн. і склаў 102% да ўзроўню мінулага года. Аб'ём экспартных паставак - $355,2 тыс., або 48,9% да ўзроўню мінулага года. Імпартныя пастаўкі перавысілі $62 млн., тэмп росту - 102,7% да адпаведнага перыяду мінулага года.-0-

БЕЛТА