22 лютага, Віцебск /Дзіяна Курыла - БЕЛТА/. Аднаўленне тэхналагічных ланцужкоў паміж прадпрыемствамі Віцебскай і Маскоўскай абласцей стане адным з асноўных напрамкаў у супрацоўніцтве двух рэгіёнаў, паведаміў сёння журналістам намеснік старшыні камітэта эканомікі - начальнік упраўлення інвестыцыйнай палітыкі і знешнеэканамічных сувязяў Віцебскага аблвыканкама Канстанцін Чорны, перадае карэспандэнт БЕЛТА. У ходзе візіту дэлегацыі Віцебскай вобласці на чале са старшынёй аблвыканкама Аляксандрам Косінцам у Маскоўскую вобласць на сустрэчы з губернатарам рэгіёну Барысам Громавым былі вызначаны асноўныя напрамкі ўзаемнага супрацоўніцтва. У прыватнасці, дзве вобласці маюць намер да канца 2012 года павялічыць узаемны таваразварот да $600 млн., а да канца 2013 года дасягнуць паказчыка ў $1 млрд. Аднак інтарэсы рэгіёнаў не абмяжоўваюцца толькі гандлем. Адным з перспектыўных напрамкаў можа стаць стварэнне сумесных прадпрыемстваў, якія ва ўмовах Адзінай эканамічнай прасторы могуць паспяхова працаваць. Як вядома, у Падмаскоўі засяроджаны навукаёмістыя вытворчасці, якія яшчэ ў гады СССР падтрымлівалі цесныя кантакты з прадпрыемствамі Віцебскай вобласці. Сёння пастаўлена задача аднавіць страчаныя сувязі, стварыць тэхналагічныя ланцужкі, сысці ад непатрэбных пасярэднікаў у гандлі, падкрэсліў Канстанцін Чорны. Для выканання пастаўленых задач бакі дамовіліся стварыць рабочыя групы па распрацоўцы пагаднення аб супрацоўніцтве, якое як раз і будзе накіравана на дасягненне пастаўленых мэт. Паміж Віцебскай і Маскоўскай абласцямі ў 1996 годзе было падпісана пагадненне аб супрацоўніцтве, але яно насіла рамачны характар і не было напоўнена канкрэтным зместам. Па выніках 2011 года таваразварот Віцебскай і Маскоўскай абласцей павялічыўся ў параўнанні з 2010 годам на 13,1% і склаў $371,2 млн. Экспарт тавараў у Маскоўскую вобласць склаў $296,9 млн., імпарт - $74,3 млн. Сальда пастаянна застаецца станоўчым і склала $222,6 млн. Трэць экспартных паставак у Маскоўскую вобласць складаюць тавары харчовай групы.