2 мая, Віцебск /Вольга Багачова - БЕЛТА/. Віцебская акадэмія ветэрынарнай медыцыны возьме шэфства над гарадскім прытулкам для бяздомных жывёл. Такі даручэнне даў сёння старшыня Віцебскага аблвыканкама Аляксандр Косінец падчас правядзення асабістага прыёму грамадзян, паведамляе карэспандэнт БЕЛТА. Даручэнне губернатара звязана са зваротам жыхаркі абласнога цэнтра, якая дапамагае жывёлам, што ўтрымліваюцца ў прытулку. Жанчына ўзняла пытанне аказання ветэрынарнай дапамогі сабакам і кошкам, бо, паводле яе слоў, адзіны штатны ветэрынар не ў стане дапамагчы адразу ўсім жывёлам, якія маюць патрэбу. Яна таксама закранула чуткі, якія з'явіліся, пра тое, што жывёлам нібыта не хапае ежы. Аляксандр Косінец абверг гэту інфармацыю. "Адходы з Віцебскага мясакамбіната, які шэфствуе над прытулкам, для забеспячэння прапітавання жывёл маюцца ў наяўнасці. Гэта проста папулізм асобных людзей. Разам з тым, калі валанцёрам падабаецца дапамагаць - калі ласка, я гэта заўсёды прывітаю", - падкрэсліў губернатар. У цяперашні час у прытулку знаходзіцца больш за 300 жывёл. У сувязі з гэтым дастаткова востры характар набывае пытанне пошуку для іх гаспадароў. На думку губернатара, аб'явы ў абласных газетах належнага эфекту не прыносяць. "Не ўсе нават ведаюць, што ў нас ёсць такі прытулак, таму што актыўная і мэтанакіраваная інфармацыйная работа з боку актывістаў таварыства абароны жывёл, валанцёраў прытулку не вядзецца", - канстатаваў Аляксандр Косінец, рэкамендаваўшы больш працаваць з сельскім насельніцтвам. Па словах Аляксандра Косінца, у найбліжэйшых планах, якія тычацца гэтага аб'екта, - абнавіць аўтамабілі па адлове жывёл, пашырыць прыбудову і зрабіць будынак закрытага характару, каб палепшыць умовы ўтрымання гадаванцаў. У цэлым ён будзе развівацца, бо праблема з бяздомнымі жывёламі не губляе актуальнасці. "У горадзе не павінна быць зграй сабак. Гэта бяспека і дзяцей, і дарослых. Акрамя таго, жыхары, якія маюць хатніх жывёл, асабліва агрэсіўных парод сабак, павінны выконваць правілы іх утрымання, выгульваць у намордніках і ў спецыяльна адведзеных месцах. І трэба сур'ёзна глядзець за гэтым пытаннем", - заключыў старшыня аблвыканкама.-0-

БЕЛТА