Віцебскія прадпрыемствы могуць стаць удзельнікамі расійскіх федэральных праграм

21 кастрычніка, Смаленск /Дзіяна Курыла - БЕЛТА/. Віцебскія прадпрыемствы "Полімерканструкцыя" і "Фортэкс-водныя тэхналогіі" могуць канкурыраваць на рынку і стаць удзельнікамі расійскіх экалагічных праграм. Такую думку выказаў карэспандэнту БЕЛТА кіраўнік справамі Віцебскага аблвыканкама Аляксей Мацюшка перад падпісаннем у Смаленску плана мерапрыемстваў па рэалізацыі пагаднення паміж Адміністрацыяй Смаленскай вобласці (Расійская Федэрацыя) і Віцебскім абласным выканаўчым камітэтам (Рэспубліка Беларусь) аб гандлёва-эканамічным, навукова-тэхнічным і культурным супрацоўніцтве на бліжэйшы год. Асноўным прыярытэтам у эканамічным супрацоўніцтве сёння з'яўляецца развіццё не толькі экспартна-імпартных аперацый, а рэалізацыя сумесных праектаў, вытворчая кааперацыя паміж суб'ектамі бакоў, падкрэсліў ён. Неабходна ўдзяляць увагу актывізацыі ўзаемных паставак тавараў з высокай ступенню перапрацоўкі, а не толькі вываз з Віцебскай вобласці рапсу, ільнаволокна, грыбоў, ягад, тарфу, мяса, малака, агародніны і бульбы. На тэрыторыі Смаленскай вобласці дзейнічаюць федэральныя праграмы, таксама плануецца распрацоўка ўласных рэгіянальных праграм, удзельнікамі якіх маглі б выступаць прадпрыемствы Віцебскай вобласці. Найбольшую цікавасць у смаленскага боку выклікаюць вопыт рэалізацыі праграм развіцця аграпрамысловага комплексу па вытворчасці лёну, малака, мяса, рапсу, агародніны, садавіны, жыллёва-камунальнай гаспадаркі, экалагічныя і прыродаахоўныя праекты. У Віцебску паспяхова працуюць прадпрыемствы ЧУП "Полімерканструкцыя" і СААТ "Фортэкс-водныя тэхналогіі", якія вырабляюць шырокую гаму ачысных станцый, станцый водападрыхтоўкі, абязжалезвання, выкарыстоўваючы самыя сучасныя тэхналогіі. На думку Аляксея Мацюшкі, гэтыя і падобныя ім вытворцы гатовыя стаць удзельнікамі расійскіх экалагічных праграм, прапанаваўшы сучасныя канкурэнтаздольныя ўмовы. Ад смаленскага боку неабходна сафінансаванне для развіцця наменклатуры вырабаў і своечасовая магчымасць удзелу ў тэндарах.

Яшчэ адным напрамкам сумеснай дзейнасці можа стаць стварэнне транспартна-лагістычных цэнтраў на мяжы з Латвіяй і Літвой або паблізу буйных транспартных вузлоў, такіх як Орша і Віцебск, дзе маюцца аэрапорты, чыгуначныя камунікацыі і аўтамабільныя аўтастрады. Дзяржаўнае аб'яднанне "Віцебскі канцэрн "Мяса-малочныя прадукты" рэалізуе інвестыцыйны праект на базе ААТ "Малако" па выпуску кісламалочнай дэмінералізаванай сыроваткі. Вядзецца пошук фінансавых кампаній для выдзялення крэдытаў. Праект экспартаарыентаваны, дазваляе весці перапрацоўку адходаў малочнай вытворчасці, валютаакупны і можа зацікавіць смаленскіх партнёраў.

Віцебская вобласць мае намер таксама прапанаваць рэалізацыю праектаў у сельгасвытворчасці і перапрацоўцы. Так, на базе Гарадоцкай птушкафабрыкі прапануецца праект па арганізацыі вытворчасці астуджаных або замарожаных яечных прадуктаў, што дазволіць шматразова павялічыць тэрміны захоўвання прадукту. Па аналогіі з канцэрнам "Дзіцячасельскі" (Ленінградская вобласць), смаленскім кампаніям могуць быць перададзены ва ўласнасць сельскагаспадарчыя кааператывы, ільназаводы для развіцця мясной і малочнай жывёлагадоўлі, будаўніцтва свінагадоўчых комплексаў, птушкафабрык, інкубатараў. Пры гэтым расійскія партнёры маюць ільготнае падаткаабкладанне ў сельскай мясцовасці, наяўнасць сыравіны, падрыхтаваныя кадры, захавана ўся інфраструктура забеспячэння вытворчасці.

Па словах Аляксея Мацюшкі, расійскія партнёры прапануюць арганізаваць вытворчую дзейнасць на тэрыторыі Смаленскай вобласці, адзначаючы магчымасць прыцягнення рэсурсаў федэральных праграм "Лён", "Зерне", "Сельскагаспадарчае машынабудаванне", а таксама зацікаўлены ў беларускім вопыце стварэння аграгарадкоў.

Знешнегандлёвы абарот за студзень-жнівень 2011 года Віцебскай і Смаленскай абласцей склаў $151,2 млн (тэмп – 126%), у тым ліку экспарт – $100,9 млн (тэмп – 118%), імпарт – $50,4 млн (тэмп – 145%). За 10 гадоў тавараабарот паміж Смаленскай і Віцебскай вобласцю павялічыўся ў 6 разоў.

Смаленская вобласць па аб'ёме тавараабароту і экспарту ўваходзіць у тройку расійскіх рэгіёнаў, якія з'яўляюцца асноўнымі гандлёвымі партнёрамі вобласці, саступаючы толькі Маскве і Маскоўскай вобласці. Удзельная вага харчовых тавараў складае 32% усяго экспарту прадпрыемстваў рэгіёну ў Смаленскую вобласць. Найбольшым попытам карыстаюцца мясныя і малочныя прадукты.-0-

БЕЛТА