Працягласць капітальнага рамонту з мадэрнізацыяй склала больш за год. За гэты час аблічча і «начынне» значнай для ўсёй педагагічнай грамадскасці рэгіёна ўстановы адукацыі зазналі істотныя змены, адзначыла **дырэктар інстытута Вольга Лапацінская:**
- Нам удалося стварыць сучаснае адукацыйнае асяроддзе. Працоўныя аўдыторыі аснашчаны інтэрактыўнымі панэлямі, мультыбордамі, сучаснымі камп'ютарамі. Абсталяваны два канферэнц-залы. З 2019 года ў нашых сценах функцыянуе рэгіянальны цэнтр педагагічнай STEM-адукацыі, на базе якога з гэтага года арганізавана праца новай лакацыі - лабараторыі 3D мадэлявання. Гэта дазволіць навучэнцам і педагогам горада і вобласці ў актыўнай форме развіваць навукова-тэхнічную творчасць, знаёміцца з высокатэхналагічнымі галінамі эканомікі, фарміраваць устойлівую матывацыю да выбару будучай прафесіі ў сферы высокіх тэхналогій. Цяпер інстытут валодае ўсімі магчымасцямі для правядзення мерапрыемстваў у дыстанцыйным рэжыме, якаснай падрыхтоўкі да розных конкурсаў, а таксама эфектыўнага міжнароднага супрацоўніцтва, бо мы з'яўляемся актыўнымі партнёрамі міжнароднай сеткі адукацыйных устаноў дадатковай адукацыі, цесна супрацоўнічаем са шматлікімі рэгіёнамі Расійскай Федэрацыі.
Па словах начальніка галоўнага ўпраўлення па адукацыі Віцебскага аблвыканкама Дзмітрыя Хомы, у Віцебскай вобласці стала добрай традыцыяй прафесійнага свята – Дня настаўніка – па магчымасці ўводзіць у строй новыя аб'екты. Цяперашняя падзея мае асаблівае значэнне:
- Віцебскі абласны інстытут развіцця адукацыі – гэта наш асноўны мазгавы і метадычны цэнтр для навучання і павышэння кваліфікацыі настаўнікаў. Цяпер іх падрыхтоўка будзе весціся ў сучасных умовах. Для нас важна прывесці ў парадак усе абласныя ўстановы адукацыі, якія адыгрываюць асноўную ролю для сістэмы адукацыі рэгіёна. Да гэтай мэты мы планамерна ідзем: у мінулыя гады прывялі ў належны стан будынкі ўстаноў дадатковай адукацыі для школьнікаў, цяпер гэты аб'ект. Далей перадалі інстытуту інтэрнат, які знаходзіцца непадалёк, і другім этапам плануем на працягу бліжэйшых гадоў абнавіць яго.
Дакранаючыся рэканструкцыі іншых аб'ектаў сістэмы адукацыі вобласці, Дзмітрый Хома адзначыў, што многае ўжо зроблена і гэтая праца выйшла на фінішную прамую:
- У бліжэйшы час плануецца адкрыццё буйнога спартыўнага стадыёна на базе Віцебскага дзяржаўнага тэхнічнага каледжа, займацца на якім будуць выхаванцы чатырох бліжэйшых устаноў адукацыі. Таксама ён будзе адкрыты для вольнага наведвання ўсімі жадаючымі.
У межах мерапрыемства таксама адбылася цырымонія ўзнагароджання лепшых педагогаў вобласці.
Крыніца: vitebsk-region.gov.by