16 лютага, Мінск /Кацярына Нячаева - БЕЛТА/. Урад Беларусі прыпыніў дзеянне пастановы аб павышанай аплаце паслуг ЖКГ для ўладальнікаў дамоў павышанай камфортнасці. Аб гэтым паведаміў сёння намеснік прэм'ер-міністра Анатоль Калінін на пашыраным пасяджэнні Пастаяннай камісіі Палаты прадстаўнікоў па дзяржаўным будаўніцтве, мясцовым самакіраванні і рэгламенце, перадае карэспандэнт БЕЛТА. Як растлумачыў віцэ-прэм'ер, адказваючы на пытанні дэпутатаў, у сувязі з прыняццем пастановы аб увядзенні павышаных тарыфаў на паслугі ЖКГ для ўладальнікаў дамоў павышанай камфортнасці (жылой плошчай больш за 200 кв.м) у сітуацыі, калі паслугі ЖКГ трэба аплачваць па больш высокіх тарыфах, апынуліся многія сацыяльна не абароненыя катэгорыі грамадзян. Напрыклад, ураду вядома аб больш чым 600 такіх дамах, дзе пражываюць ветэраны Вялікай Айчыннай вайны і працы, шматдзетныя сем'і, іншыя сацыяльна не абароненыя катэгорыі, расказаў Анатоль Калінін. У сувязі з гэтым прынята рашэнне прыпыніць дзеянне раней прынятай пастановы "да распрацоўкі адпаведнага механізму", адзначыў віцэ-прэм'ер. Ён растлумачыў, што ўрад прапануе ў хуткім часе ўвесці двух узроўневыя тарыфы, якія складаюцца з пастаяннай і зменнай часткі. "У першую будзе ўваходзіць плата за нарматыўнае спажыванне і доступ да паслуг, у другую – аплата за звыш нарматыўнае спажыванне паслуг і камфортнасць", - сказаў Анатоль Калінін. Віцэ-прэм'ер запэўніў, што будучую сістэму аплаты абавязкова абмяркуюць з дэпутатамі. "У першым набліжэнні намі разглядаецца градацыя жылля плошчай 300 кв.м і больш, каб выключыць сацыяльную катэгорыю грамадзян", - удакладніў ён. Анатоль Калінін нагадаў, што да канца пяцігодкі ўзровень пакрыцця затрат на паслугі ЖКГ з боку насельніцтва павялічыцца да 60%, а на паслугі натуральных манаполій дасягне ўзроўню сабекошту (гэта датычыцца цепла-, энерга-, газазабеспячэння, а таксама водазабеспячэння і водаадвядзення). -0-

БЕЛТА