Уладальнікі Аршанскага авіярамонтнага завода інвеставалі ў прадпрыемства за год больш за $13 млн.

14 снежня. Віцебск /Дзіяна Курыла - БЕЛТА/. Уласнікі адкрытага акцыянернага таварыства "Аршанскі авіярамонтны завод" за год інвеставалі ў прадпрыемства больш за $13 млн, паведаміў карэспандэнту БЕЛТА дырэктар ААТ "Аршанскі авіярамонтны завод" Уладзімір Троіцкі. Сродкі накіроўваліся на тэхнічнае пераўзбраенне. Акрамя таго, дзякуючы стратэгічнаму інвестару ўкраінскаму публічнаму акцыянернаму таварыству "Матор Січ" на прадпрыемстве ўкараняецца праграма мадэрнізацыі верталётаў МІ-8Т з устаноўкай на іх новых рухавікоў пятага пакалення з павышанымі тэхнічнымі характарыстыкамі, эканамічнымі і якія маюць больш працяглы рэсурс. Па словах Уладзіміра Троіцкага, дзякуючы менавіта гэтаму рухавіку ўпершыню ў кастрычніку 2012 года верталёт МІ-8МСБ падняўся на вышыню 8,2 тыс.м, тым самым усталяваўшы сусветны рэкорд для гэтага тыпу верталётаў. У 2013 годзе Аршанскі авіярамонтны завод актывізуе знешнеэканамічную дзейнасць. Партфель заказаў ад замежных партнёраў практычна сфарміраваны. Разам з вытворчай дзейнасцю інвестары ўкладваюць сродкі ў развіццё сацыяльнай сферы прадпрыемства і пасёлка Балбасава, дзе знаходзіцца прадпрыемства. Падыходзіць да завяршэння рэканструкцыя першага інтэрната, а ў 2013 годзе будуць завершаны работы па абнаўленні другога інтэрната. У бягучым годзе на рэканструкцыю дома культуры ў Балбасава інвестарамі было накіравана каля Br500 млн.

У канцы снежня 2011 года дзяржава ажыццявіла адчужэнне шляхам продажу акцый адкрытага акцыянернага таварыства "Аршанскі авіярамонтны завод" стратэгічным інвестарам - ЗАТ "Сістэмы інвестыцый і інавацый" (Беларусь) і ПАТ "Мотор Січ" (Украіна). ЗАТ "Сістэмы інвестыцый і інавацый" стала ўладальнікам 1488171 акцый, 2232256 акцый (каля 60%) прададзена ПАТ "Мотор Січ".

Інвестары ўзялі на сябе абавязацельствы на працягу 2012-2016 гадоў укласці ў рэканструкцыю, мадэрнізацыю вытворчых магутнасцей не менш за 12 млн. долараў ЗША, стварыць звыш 300 працоўных месцаў. Акрамя таго, на працягу двух гадоў з дня заключэння інвестыцыйнай дамовы новыя ўладальнікі прадпрыемства павінны правесці рэканструкцыю двух інтэрнатаў Аршанскага авіярамонтнага завода, а таксама накіраваць на працягу пяці гадоў каля 20 млрд. беларускіх рублёў у сацыяльна-эканамічнае развіццё пасёлка Балбасава.

Аршанскі авіярамонтны завод быў створаны ў 1941 годзе. У канцы 2009 года прадпрыемства акцыянавана. Завод з'яўляецца ўладальнікам сертыфіката Авіяцыйнага рэгістра Міждзяржаўнага авіяцыйнага камітэта, які сведчыць аб адпаведнасці Аршанскага авіярамонтнага завода патрабаванням Авіяцыйных правілаў, стандартаў і рэкамендацый ІКАО, міжнародных стандартаў ІСО серыі 9000, а таксама правілаў JAR-145 і EAR-145. Акрамя таго, завод мае сертыфікат Расійскіх федэральных авіяцыйных правілаў ФАП-145Р на права выканання капітальнага рамонту верталёта МІ-8. На авіярамонтным заводзе працуюць больш за 500 чалавек. Тэмп росту вытворчасці прадукцыі ў супастаўных цэнах у студзені-лістападзе 2012 года да аналагічнага перыяду 2011 года склаў 132%.

ПАТ "Матор Січ" - адзін з найбуйнейшых сусветных вытворцаў рухавікоў для авіяцыйнай тэхнікі, а таксама прамысловых газатурбінных установак. Пастаўляе прадукцыю ў 120 краін свету. У агульным аб'ёме экспарту прадпрыемства каля 30% прыпадае на Расійскай Федэрацыі. "Матор Січ" забяспечвае больш чым на 80% патрэбу авіяпрама РФ у верталётных рухавіках.-0-

БЕЛТА