25 студзеня, Мінск /Юлія Ваніна - БЕЛТА/. Усім студэнтам-платнікам прадастаўлена магчымасць растэрміноўкі плацяжоў за навучанне. Пра гэта паведаміў на прэс-канферэнцыі міністр адукацыі Беларусі Сяргей Маскевіч, перадае карэспандэнт БЕЛТА. Па словах міністра, растэрміноўку можна пагашаць як штомесяц, так і праз месяц, праз два, у любы зручны для студэнта час. Міністр адукацыі падкрэсліў, што павышэнне цэн на навучанне было звязана з павелічэннем тарыфнай стаўкі першага разраду. "У Кодэксе аб адукацыі, які ўступіць у сілу з 1 верасня, пытанні аплаты навучання будуць адрэгуляваны з улікам рэальнасці", - адзначыў ён. У кодэксе таксама прадугледжана падпісанне дагавора на навучанне. "Сярод перспектыўных задач, якія плануецца вырашыць у найбліжэйшы час, - удакладненне кантрольных лічбаў прыёму ў ВНУ і ССНУ", - адзначыў ён. Платная форма навучання добра сябе зарэкамендавала, але трэба больш глыбока і ўзважана падыходзіць да пытання падрыхтоўкі спецыялістаў, асабліва платнай формы навучання, улічваць рэальныя патрэбы ўсіх сектараў эканомікі, растлумачыў Сяргей Маскевіч. У Беларусі недастаткова выразна развіты кантакты паміж ВНУ і прадпрыемствамі. "Трэба больш сур'ёзна арганізаваць гэтую ўзаемасувязь", - адзначыў ён. Па яго словах, у Кодэксе аб адукацыі прадугледжана павышэнне адказнасці ўсіх удзельнікаў адукацыйнага працэсу, гэта значыць патрабаванні будуць узмоцнены да ўсіх - педагогаў, студэнтаў, навучэнцаў і працадаўцаў. Пытанне аб кадравым забеспячэнні, у тым ліку і прыватнага сектара эканомікі, трэба вырашаць у найбліжэйшы час. У якасці прыкладу ён прывёў сферу інфармацыйных тэхналогій. "У найбліжэйшыя гады гэтай сферы спатрэбяцца больш за 2 тыс. спецыялістаў", - адзначыў ён.-0-

БЕЛТА