Выбары Прэзідэнта Беларусі прызначаны на 19 снежня 2010 года

14 верасня, Мінск /Людміла Сац - БЕЛТА/. Выбары Прэзідэнта Беларусі прызначаны на 19 снежня 2010 года. Такое рашэнне прынята сёння на пасяджэнні 5-й, пазачарговай сесіі Палаты прадстаўнікоў Нацыянальнага сходу Беларусі, перадае карэспандэнт БЕЛТА. Усе прысутныя 108 дэпутатаў аднагалосна прагаласавалі за гэту дату. У адпаведнасці з Канстытуцыяй Беларусі і Выбарчым кодэксам Палата прадстаўнікоў не пазней чым за пяць месяцаў да заканчэння тэрміну паўнамоцтваў Прэзідэнта Беларусі прызначае выбары Прэзідэнта. Яны праводзяцца не пазней чым за два месяцы да заканчэння тэрміну паўнамоцтваў папярэдняга Прэзідэнта. Такім чынам, згодна з дзеючым заканадаўствам, выбары Прэзідэнта Беларусі павінны прайсці не пазней 6 лютага 2011 года. Як паведамлялася, пры вызначэнні даты выбараў Пастаянная камісія па дзяржаўным будаўніцтве, мясцовым самакіраванні і рэгламенце зыходзіла з таго, каб забяспечыць максімальны ўдзел грамадзян у выбарчай кампаніі і правесці яе ў зручны для выбаршчыкаў час. Правядзенне выбараў да канца года дазволіць без страты часу на выбарчы працэс літаральна з пачатку 2011 года прыступіць да ажыццяўлення задач сацыяльна-эканамічнага развіцця краіны на чарговы год і пяцігоддзе. Акрамя таго, пачатак года насычаны свецкімі і рэлігійнымі святамі, таму гэты перыяд з'яўляецца не зусім зручным для правядзення выбараў. Пасля агалошвання меркаванай даты сярод дэпутатаў разгарэлася дыскусія па гэтым пытанні. У прыватнасці, дэпутатаў цікавіла пытанне аб даце другога тура выбараў, у выпадку калі ён спатрэбіцца. Справа ў тым, што другі тур выбараў, як правіла, праходзіць праз два тыдні пасля першага. Такім чынам, калі першы тур выбараў адбудзецца 19 снежня 2010 года, то другі тур прыйдзецца на 2 студзеня 2011 года. У сувязі з гэтым старшыня Пастаяннай камісіі па дзяржаўным будаўніцтве, мясцовым самакіраванні і рэгламенце Васіль Байкоў растлумачыў, што ў артыкуле 80 Выбарчага кодэкса Рэспублікі Беларусь дакладна прапісана, што для другога тура галасавання ЦВК прызначае дату выбараў не пазней чым праз два тыдні пасля першага тура. Такім чынам, другі тур прэзідэнцкіх выбараў у Беларусі можа быць прызначаны раней чым 2 студзеня 2011 года.

Таксама з боку дэпутатаў паступалі прапановы правесці выбары ў студзені 2011 года. Яны аргументавалі гэта тым, што згодна з дзеючым заканадаўствам паўнамоцтвы цяперашняга Прэзідэнта Беларусі сканчаюцца ў красавіку 2011 года. У сувязі з гэтым узнікае пытанне: ці ёсць неабходнасць скарачаць тэрмін паўнамоцтваў дзеючага Прэзідэнта? Асобныя дэпутаты прапаноўвалі прызначыць датай выбараў 6 лютага. Разглядаючы гэтае пытанне, Васіль Байкаў адзначыў, што ў выпадку правядзення выбараў 19 снежня актыўнасць насельніцтва будзе значна вышэйшай, чым у выпадку правядзення выбараў у лютым. Справа ў тым, што на пачатак года прыпадае час студэнцкіх канікул і асобная частка насельніцтва можа з'ехаць на адпачынак. Таму правесці выбары мэтазгодна 19 снежня, на думку Васіля Байкава. Паступалі таксама прапановы і аб правядзенні выбараў 12 снежня. Па словах Васіля Байкава, паміж датай прызначэння выбараў і датай іх правядзення не павінна быць менш за тры месяцы. Сёння 14 верасня, такім чынам, ужо не ўкладваемся ў дату 12 снежня. Па выніках праведзенай дыскусіі ўсе прысутныя 108 дэпутатаў аднагалосна прагаласавалі за дату 19 снежня. Старшыня Палаты прадстаўнікоў Нацыянальнага сходу Рэспублікі Беларусь Уладзімір Андрэйчанка на закрыцці 5-й, пазачарговай сесіі Палаты прадстаўнікоў 4-га склікання адзначыў: "Мы прынялі рашэнне аб правядзенні 19 снежня 2010 года выбараў Прэзідэнта Рэспублікі Беларусь. З улікам значнасці гэтай падзеі для краіны нам трэба правесці сур'ёзную і адказную арганізацыйна-палітычную працу як у парламенце, так і ў выбарчых акругах, каб выбары кіраўніка дзяржавы прайшлі адкрыта, дэмакратычна, у строгай адпаведнасці з Канстытуцыяй". Ён таксама адзначыў, што хоць сесія была нядоўгай, але з-за маштабнасці разгледжаных пытанняў яе вынікі вельмі значныя як для вырашэння бягучых сацыяльна-эканамічных задач, так і для вызначэння шляхоў развіцця краіны на перспектыву."Унікальнасць мінулай сесіі вызначаецца і тым, што ніколі раней падрыхтоўка і прыняцце праекта Закона аб рэспубліканскім бюджэце не праходзілі ў такім аператыўным і напружаным рэжыме", - сказаў Уладзімір Андрэйчанка. Паводле яго слоў, прыняцце пакета дакументаў, накіраваных на ўдасканаленне бюджэтна-фінансавай і падатковых сфер, дазволіць значна ўмацаваць прававы фундамент праводзімай у краіне палітыкі па лібералізацыі эканомікі, раскрапошчэнні прадпрымальніцкай ініцыятывы і забеспячэнні эфектыўнага посткрызіснага развіцця. Асаблівую актуальнасць гэтыя рашэнні набываюць у кантэксце падрыхтоўкі правядзення 4-га Усебеларускага народнага сходу. Уладзімір Андрэйчанка таксама падкрэсліў, што адметнай асаблівасцю будучай сесіі стане тое, што значная частка пытанняў будзе мець сацыяльную накіраванасць. У ліку найбольш рэзанансных законапраектаў - Кодэкс аб адукацыі, Жыллёвы кодэкс, закон "Аб зваротах грамадзян і юрыдычных асоб". У цяперашні час у пастаянных камісіях знаходзіцца ўжо больш за 50 законапраектаў, і плануецца, што агульная колькасць пытанняў парадку дня сесіі вырасце як мінімум удвая. Уладзімір Андрэйчанка пажадаў усім дэпутатам працоўнага настрою і нацэленасці на якасную падрыхтоўку да будучай сесіі.-0-

БЕЛТА