Выязджаць на аўтамабілі за мяжу беларусы цяпер могуць не часцей аднаго разу на 8 дзён

21 лістапада, Мінск /Кар. БЕЛТА/. Выязджаць за межы Мытнага саюза на аўтамабілі з Беларусі цяпер можна адзін раз на восем дзён. Гэта прадугледжана пастановай Саўміна Беларусі ад 18 лістапада 2011 года №1554, паведамілі карэспандэнту БЕЛТА ў прэс-службе беларускага ўрада. Дакументам уносяцца змяненні ў пастанову Савета Міністраў ад 10 чэрвеня 2011 года №753 "Аб некаторых пытаннях рэгулявання вывазу аўтамабільнага паліва з тэрыторыі Рэспублікі Беларусь". Новая пастанова прынята для ўзмацнення мер па абмежаванні вывазу з краіны аўтамабільнага паліва і стабілізацыі абстаноўкі ў пунктах пропуску праз дзяржграніцу Беларусі. Да тавараў для асабістага карыстання, якія вывозяцца з тэрыторыі Беларусі фізічнымі асобамі за межы мытнай тэрыторыі Мытнага саюза, не адносіцца аўтамабільнае паліва ў выпадках: выезду фізічнай асобы, якая кіруе аўтамабільным транспартным сродкам, больш за адзін раз на працягу 8 сутак; вывазу аўтамабільнага паліва адным і тым жа аўтамабільным транспартным сродкам больш за адзін раз на працягу 8 сутак незалежна ад таго, якімі асобамі быў ажыццёўлены вываз такога аўтамабільнага транспартнага сродку ў гэты перыяд.

Дзеянне гэтага палажэння пастановы не распаўсюджваецца на супрацоўнікаў дыпламатычных прадстаўніцтваў, консульскіх устаноў, міжнародных арганізацый, прадстаўніцтваў гэтых арганізацый і членаў іх сем'яў – пры прад'яўленні дыпламатычных (службовых) пашпартоў альбо іншых дакументаў, якія пацвярджаюць іх статус. Не закрануць абмежавальныя меры і фізічных асоб, якія працуюць у дзяржаўных органах і іншых дзяржаўных арганізацыях, а таксама вайскоўцаў, асоб начальніцкага і радавога складу Следчага камітэта, органаў унутраных спраў, органаў і падраздзяленняў па надзвычайных сітуацыях, органаў фінансавых расследаванняў, накіроўваных у службовыя камандзіроўкі за мяжу (пры прад'яўленні выпісак з рашэнняў адпаведных органаў (арганізацый) і (або) камандзіровачных пасведчанняў, выдадзеных гэтымі органамі (арганізацыямі). Абмежавальныя меры таксама не распаўсюджваюцца на работнікаў дзяржаўных арганізацый дзяржаў-членаў Мытнага саюза, размешчаных на тэрыторыі замежных дзяржаў, кіроўцаў аўтатранспартных сродкаў, якія ажыццяўляюць міжнародныя перавозкі пасажыраў, работнікаў юрыдычных асоб, а таксама іншых фізічных асоб пры наяўнасці ўважлівых прычын у адпаведнасці з прынятым Дзяржаўным памежным камітэтам і Дзяржаўным мытным камітэтам рашэннем. Міністэрству ўнутраных спраў даручана прыняць дзейсныя меры па недапушчэнні парушэнняў правілаў дарожнага руху і грамадскага парадку на тэрыторыях, прылеглых да аўтадарожных пунктаў пропуску праз дзяржаўную мяжу Беларусі, забяспечыць пастаяннае патруляванне месцаў стаянак аўтатранспарту, які выязджае з краіны. Міністэрства транспарту і камунікацый сумесна з Міністэрствам унутраных спраў, Дзяржаўным памежным камітэтам, аблвыканкамамі павінна абсталяваць стаянкі перад аўтадарожнымі пунктамі пропуску праз дзяржмяжу Беларусі, пашырыць пад'язныя шляхі да іх, вылучыць спецыяльны калідор для транспартных сродкаў грамадзян краін Мытнага саюза, забяспечыць устаноўку дадатковых дарожных знакаў паблізу названых пунктаў, якія вызначаюць напрамкі (паласы) руху транспартных сродкаў, неабходных забараняючых (прадпісваючых) знакаў і дарожнай разметкі. Беларускаму дзяржаўнаму канцэрну па нафце і хіміі даручана прыняць меры па абмежаванні продажу аўтамабільнага паліва (не больш за 200 л на адзін грузавы транспартны сродак) на аўтазаправачных станцыях, размешчаных на памежнай тэрыторыі.Пастанова ўступае ў сілу праз тры дні пасля яе афіцыйнага апублікавання.-0-

БЕЛТА