16 верасня, Мінск /Алена Прус - БЕЛТА/. Выплата аднаразовай матэрыяльнай дапамогі непрацуючым пенсіянерам і атрымальнікам дапамог у органах па працы, занятасці і сацыяльнай абароне пачнецца ва ўсіх рэгіёнах Беларусі пасля 20 верасня. Пра гэта паведаміла карэспандэнту БЕЛТА намеснік міністра працы і сацыяльнай абароны Валянціна Каралёва. Яна растлумачыла, што для правядзення арганізацыйна-тэхнічных мерапрыемстваў па забеспячэнні рэалізацыі ўказа №417 "Аб аднаразовай матэрыяльнай дапамозе" спатрэбіцца 3-4 дні. Так, неабходна скласці ведамасці, надрукаваць іх, накіраваць у аддзяленні паштовай сувязі, банкі і прадпрыемствы па дастаўцы пенсій. Выплата будзе ажыццёўлена ў парадку, устаноўленым для выплаты пенсій і дапамог, падкрэсліла Валянціна Каралёва. Дапамога ў памеры Br500 тыс. будзе выплачана непрацуючым атрымальнікам пенсій (незалежна ад яе памеру) - 1 млн. 847,7 тыс. чалавек. Дзеянне ўказа распаўсюджваецца і на атрымальнікаў дапамог. Гэта людзі, якія атрымліваюць дапамогі па доглядзе за дзіцем ва ўзросце да 3 гадоў (308,3 тыс.), па доглядзе за дзіцем-інвалідам ва ўзросце да 18 гадоў і якія атрымліваюць дапамогі на дзіця, інфікаванага ВІЧ (11,9 тыс. чалавек), а таксама дапамогі па доглядзе за інвалідам I групы, састарэлым, якія дасягнулі 80-гадовага ўзросту, якія маюць патрэбу па заключэнні МРЭК або дзяржаўнай арганізацыі аховы здароўя ў пастаянным доглядзе (39,5 тыс. чалавек). Дапамога не будзе выплачана тым, хто на 1 верасня бягучага года знаходзіўся на дзяржабеспечанні, у месцах пазбаўлення волі, а таксама пенсіянерам, якія атрымліваюць пенсіі з іншых дзяржаў і ад Рэспублікі Беларусь у іншых дзяржавах. Пры адсутнасці ў чалавека магчымасці атрымаць дапамогу ў верасні з прычыны асабістых абставін яна будзе выплачана яму ў кастрычніку.-0-

БЕЛТА