Выстава дзіцячых малюнкаў міжнароднага дабрачыннага праекта "Дзеці вітаюць дзяцей" адкрылася ў Беларускім тэатры лялек "Лялька" ў Віцебску, перадае карэспандэнт БЕЛТА.
Выстава дзіцячых малюнкаў міжнароднага дабрачыннага праекта "Дзеці вітаюць дзяцей" адкрылася ў Беларускім тэатры лялек "Лялька" ў Віцебску, перадае карэспандэнт БЕЛТА.
Экспазіцыя ўключае 37 работ дзяцей-сірот, дзяцей з інваліднасцю, з шматдзетных і апекунскіх сем'яў і іншых дзяцей ва ўзросце ад 9 да 13 гадоў. Удзельнікамі праекта сталі выхаванцы дапаможнай школы №26 Віцебска, дзіцячага дома і абласнога палаца дзяцей і моладзі, якія з 23 па 26 кастрычніка працавалі разам з нямецкім мастаком Матыясам Юрке. Ён шмат гадоў праводзіць майстар-класы і дапамагае рабіць першыя крокі ў маляванні дзецям у Германіі, Польшчы, Румыніі, Ізраілі, Украіне, Малдове. Па традыцыі некалькі твораў госць забірае з сабой у Германію, каб у далейшым прадставіць на выстаўках.
"Мастацтва сцірае межы паміж дзецьмі розных краін, дапамагае ім наладзіць зносіны. Для мяне ўсе дзеці аднолькавыя і ўсе як адзін мастакі", - адзначыў Матыяс Юрке.
Ён дадаў, што даўно марыў прыехаць на радзіму Марка Шагала і яму вельмі спадабаўся Віцебск. Мастак плануе ў наступным годзе зноў наведаць горад над Дзвіной, але ўжо на больш працяглы перыяд і папрацаваць з дзецьмі старэйшага ўзросту.
Выстава будзе працаваць да 9 лістапада.
Дабрачынны праект "Дзеці вітаюць дзяцей" стартаваў у Беларусі ў 2012 годзе па запрашэнні Беларускага дзіцячага фонду. Яго асноўная ідэя - творчае развіццё дзяцей-сірот і дзяцей з абмежаванымі магчымасцямі, зносіны дзяцей і дарослых праз творчасць. Рэалізуе праект кіраўнік міжнароднай асацыяцыі мастакоў Atelier of art нямецкі публіцыст і валанцёр Матыяс Юрке. Ён праводзіць майстар-класы, навучае тэхніцы працы з акрылавымі фарбамі па дрэве, з мяккім каменем. За шэсць гадоў праекта каля 200 дзяцей-сірот, дзяцей з абмежаванымі магчымасцямі з Мінска, Бабруйска, Асіповічаў, Ліды, Гродна, Віцебска і іншых гарадоў Беларусі прынялі ўдзел у майстар-класах Матыяса Юрке і членаў міжнароднай асацыяцыі мастакоў Atelier of art. Дзеці таксама пабывалі ў Германіі, дзе разам з нямецкімі школьнікамі займаліся творчасцю, знаёміліся, мелі зносіны, вучыліся адкрываць прыгожае ў простых рэчах.