Выстава-форум "Мацярынства і дзяцінства" пройдзе 12-15 кастрычніка ў Мінску, паведамілі БЕЛТА арганізатары мерапрыемства.
Выстава-форум "Мацярынства і дзяцінства" пройдзе 12-15 кастрычніка ў Мінску, паведамілі БЕЛТА арганізатары мерапрыемства.
На экспазіцыйнай пляцоўцы па праспекце Пераможцаў будуць прадстаўлены тавары і паслугі для дзяцей, нованароджаных, цяжарных жанчын. Сярод іх - касметыка, гігіенічная прадукцыя, адзенне, аксэсуары, абутак, літаратура, аўдыё- і відэапрадукцыя, цацкі, мэбля для дзіцячых пакояў. Наведвальнікі змогуць азнаёміцца з магчымасцямі цэнтраў дадатковай адукацыі і ранняга развіцця, дзіцячых моўных, лагапедычных і забаўляльных цэнтраў, мастацкіх студый, спартыўных комплексаў і клубаў, цэнтраў сацыяльнай дапамогі сям'і і дзецям.
У праграме значацца мерапрыемствы рознага фармату: семінары, трэнінгі, майстар-класы, конкурсы, паказы, прэзентацыі, акцыі. Будуць арганізаваны бясплатныя кансультацыі па пытаннях выплаты дзяржаўных дапамог па доглядзе за дзіцем, адраснай сацыяльнай дапамогі шматдзетным сем'ям, працаўладкавання, санаторна-курортнага аздараўлення, псіхалогіі, медыцынскага абслугоўвання. Прадугледжаны праца фуд-корта з дэгустацыяй навінак прадуктаў харчавання, некалькі гульнявых зон для дзяцей розных узростаў, пакой адпачынку мамы і малога, паркінг для калясак.
14 кастрычніка адбудзецца фестываль блізнят і падвойнікаў "Шчасце ўдвая", аб удзеле ў якім заявілі 217 сем'яў, з іх 12 выхоўваюць трайнят. Наведвальнікі змогуць убачыць парад блізнят і падвойнікаў, танцы "гадавасікаў" з дзіцячага клуба "БэбіУм", паказы мадэляў і касцюмаў, інклюзіўны мюзікл "Мэры Попінс і чароўны парасон".
Выстава-форум "Мацярынства і дзяцінства" праводзіцца ў Мінску ў пяты раз, яе арганізатарам выступае выставачнае прадпрыемства "Экспафорум" пры падтрымцы Мінгарвыканкама. Уваход на ўсе мерапрыемствы свабодны. Гасцей чакаюць 12-14 кастрычніка з 10.00 да 19.00, 15 кастрычніка - з 10.00 да 15.00.