Выстава латвійскага майстра "Яніс Струпуліс. 100 медалёў" адкрыецца 5 лістапада ў Музеі гісторыі прыватнага калекцыянавання ў Віцебску, паведамілі карэспандэнту БЕЛТА ва ўстанове.
Выстава латвійскага майстра "Яніс Струпуліс. 100 медалёў" адкрыецца 5 лістапада ў Музеі гісторыі прыватнага калекцыянавання ў Віцебску, паведамілі карэспандэнту БЕЛТА ва ўстанове.
У экспазіцыі будуць прадстаўлены каля 100 медалёў, створаных з 1976 па 2016 гады. Яніс Струпуліс стварыў беларускую серыю твораў, у якую ўвайшлі медалі з выявамі Ф. Скарыны, С. Полацкага, С. Буднага, В. Цяпінскага, М. Сматрыцкага і іншых выдатных беларускіх дзеячаў культуры і навукі. Некалькі работ у мінулым годзе майстар з Латвіі перадаў у дар Віцебскаму абласному краязнаўчаму музею.
"На працягу гадоў творчыя прыярытэты майстра мяняліся, але нязменнымі засталіся майстэрства і вытанчанасць, лаканічнасць пластычнай мадэліроўкі. Разважаючы пра манеру Яніса Струпуліса ў медальерным мастацтве, можна гаварыць і пра своеасаблівую аўтарскую рэжысуру кампазіцыі, інтэлектуалізм вобразаў", - адзначылі ў музеі.
Арганізатарамі выставы выступілі Музей гісторыі прыватнага калекцыянавання, Консульства Латвіі ў Віцебску і Віцебскі дзяржуніверсітэт імя П.М. Машэрава.
Яніс Струпуліс - вядомы латвійскі скульптар, медальер і графічны дызайнер. У 1973 годзе скончыў скульптурнае аддзяленне Латвійскай акадэміі мастацтваў, працаваў сцэнічным дызайнерам на тэлебачанні, мастаком па афармленні інтэр'ераў у Рыжскіх майстэрнях дэкаратыўнага мастацтва. Дыяпазон яго работ шырокі: ад медалёў у гонар выдатных сусветных дзеячаў навукі, культуры і мастацтва, да работ з выявамі знакавых падзей, дзяржаўнага герба і гарадоў Латвіі, а таксама распрацоўкі дызайну сучасных манет роднай краіны. Яніс Струпуліс - лаўрэат розных міжнародных узнагарод, член Міжнароднай федэрацыі медальернага мастацтва (FIDEM). Усяго стварыў больш за 750 медалёў. Творы мастака знаходзяцца ў 60 музеях 18 краін свету.