Гэтай вясной ратавальнікам давялося сутыкнуцца з вялікай колькасцю пажараў, прычынай якіх стала выпальванне сухой расліннасці.
Гэтай вясной ратавальнікам давялося сутыкнуцца з вялікай колькасцю пажараў, прычынай якіх стала выпальванне сухой расліннасці. Наводзячы парадак на ўласных падворках, прысядзібных ці дачных участках, людзі не задумваюцца над тым, да якіх наступстваў могуць прывесці такія дзеянні. Многія, асабліва пенсіянеры, не разлічваюць свае сілы і збольшага не могуць справіцца з агнём, які выходзіць з-пад кантролю. Захопленыя вясновымі клопатамі, гаспадары занадта позна заўважаюць, што полымя, падхопленае ветрам, перакінулася на бліжэйшыя тэрыторыі і пабудовы. Справіцца з такім агнём без дапамогі ратавальнікаў ужо немагчыма.
Усяго сёлета ў рэспубліцы зарэгістравана 4425 выпадкаў загарання сухой расліннасці, у выніку якіх загінула 13 чалавек, траўмавана 15 чалавек, знішчана 22 жылыя дамы, 19 дачных дамоў, 218 гаспадарчых пабудоў, агнём пашкоджана 80 жылых дамоў, 22 дачныя дамы, 128 гаспадарчых пабудоў.
У сакавіку-красавіку на тэрыторыі нашай вобласці зарэгістравана 539 загаранняў сухой расліннасці, адбылося 20 пажараў ад выпальвання сухой травы, развядзення вогнішчаў і спальвання смецця, у выніку якіх агнём знішчана 24 будынкі, пашкоджана 26 будынкаў. На жаль, не абышлося без ахвяр – загінула 2 чалавекі.
Удзень 17 сакавіка ў раённую бальніцу паступіла пенсіянерка 1935 г.н., якая пражывае ў в.Зеленае Талачынскага раёна. У ходзе разбіральніцтва было ўстаноўлена, што бабуля выпальвала сухую расліннасць каля свайго дома, і агонь перакінуўся на яе. Гэта заўважыла суседка, якая паклікала на дапамогу яшчэ адну аднавяскоўку. Але пакуль жанчыны паспелі, пенсіянерка сама збіла полымя, аднак пры гэтым атрымала моцныя апёкі. Суседкі выклікалі хуткую дапамогу, і пацярпелая была шпіталізавана ў раённую бальніцу з апёкамі 85% цела. На наступны дзень ад атрыманых траўм пенсіянерка памерла ва ўстанове аховы здароўя.
Увечары 18 сакавіка ў абласным цэнтры ў раёне вул. Карла Маркса быў знойдзены труп мужчыны са слядамі апёкаў. Яго цела знаходзілася на абгарэлым участку зямлі плошчай каля 100 м2, а побач адбывалася гарэнне сухой расліннасці.
Аднак пажараў з буйнымі і асабліва буйнымі матэрыяльнымі стратамі ў выніку выпальвання сухой расліннасці на тэрыторыі Віцебскай вобласці ў бягучым годзе не дапушчана. Сітуацыя ў іншых абласцях аказалася больш трывожнай, вось толькі некалькі прыкладаў:
16 сакавіка адбыўся пажар у САД «Сярэбраная крыніца» каля в. Стары Сінін Магілёўскага раёна, у выніку якога агнём пашкоджаны 3 дачныя дамы і 3 гаспадарчыя пабудовы. Работнікамі МНС выратаваны 10 дачных дамоў і 12 гаспадарчых пабудоў.
У гэты ж дзень у выніку пажару ў в. Арэхава Бабруйскага раёна Магілёўскай вобласці агнём знішчаны жылы дом, пашкоджаны 3 жылыя дамы і 4 гаспадарчыя пабудовы. Работнікамі МНС выратаваны 6 жылых дамоў і 3 гаспадарчыя пабудовы.
24 сакавіка адбыўся пажар у в. Клетнае Барысаўскага раёна Мінскай вобласці. У выніку пажару знішчаны 1 жылы дом, 2 дачныя дамы, 1 нежылы дом, 8 гаспадарчых пабудоў, пашкоджаны 1 дачны дом і 1 гаспадарчая пабудова.
У большасці выпадкаў вінаватымі пажараў ад выпальвання сухой травы, развядзення вогнішчаў і спальвання смецця сталі не самі гаспадары – многія на момант узнікнення пажараў знаходзіліся па-за тэрыторыямі сваіх домаўладанняў і пацярпелі ад бестурботнасці зусім старонніх асоб.
У чарговы раз МНС нагадвае, што на тэрыторыі
Пасля ўнясення змяненняў у правілы пажарнай бяспекі дапускаецца кантраляванае развядзенне вогнішчаў для спальвання смецця і адходаў на спецыяльна падрыхтаваных пляцоўках. Пры гэтым пляцоўкі павінны быць акаймаваны ачышчанай ад мінеральнага пласта глебы паласой шырынёй не менш за 25 сантыметраў. Паліць адходы неабходна ў бязветранае надвор'е, пад пастаянным кантролем, пры абавязковай наяўнасці першасных сродкаў пажаратушэння і на бяспечнай адлегласці - 15 м ад будынкаў і збудаванняў, 20 м ад ляснога масіву і 30 м ад месцаў, дзе захоўваецца сена або салома. Пасля спальвання смецця і адходаў на пляцоўках, падпаленыя матэрыялы павінны быць патушаны да поўнага спынення тлення. Ні ў якім выпадку нельга пры спальванні смецця выкарыстоўваць гаручыя вадкасці, а таксама пакідаць непатушаныя вогнішчы, запалкі, недакуркі і іншае смецце.
Каб не дапусціць загаранняў сухой расліннасці, пастаянна ачышчайце ад сухой травы, лісця і смецця прысядзібныя ўчасткі, не разводзіце вогнішчы паблізу дачных пабудоў і прыватных жылых домаўладанняў, не выкідвайце ў сухую траву непатушаныя цыгарэты і запалкі.
Памятайце, што толькі ваша асцярожнасць і здаровы сэнс дапамогуць Вам пазбегнуць няшчасных выпадкаў і трагічных наступстваў. Растлумачце Вашым дзецям, да чаго можа прывесці выпальванне сухой травы, тым больш што за наступствы будуць адказваць іх бацькі. А калі вы вырашылі адпачыць на прыродзе, не пакідайце агонь без нагляду нават на кароткі час.