1 жніўня, Мінск /Таццяна Лобас - БЕЛТА/. Дзяржзаказ па продажы збожжа выкананы на 30% - у кошт дзяржаўных рэспубліканскіх патрэб ад сельгасарганізацый паступіла 305,6 тыс.т збожжа новага ўраджаю, паведаміў карэспандэнту БЕЛТА начальнік аддзела рэсурсаў і гандлю дэпартамента па хлебапрадуктах Мінсельгасхарчу Міхаіл Рабушка. Па словах спецыяліста, дзяржаўны заказ у гэтым годзе складае 1 млн. 25 тыс.т харчовага збожжа і 175 тыс.т алейнанасенных культур рапсу. Арганізацыі па хлебапрадуктах павінны прыняць 570 тыс.т пшаніцы, 300 тыс.т жыта і 155 тыс.т іншых культур. Дзяржзаказ па харчовым збожжы ў параўнанні з мінулым годам павялічаны на 3,5%. Па аператыўных даных, у цяперашні час на элеватары і хлебапрыёмныя пункты ўжо паступіла 187 тыс.т пшаніцы, 106,5 тыс.т жыта і 12,1 тыс.т іншых культур, што складае да плана 33%, 36% і 7,8% адпаведна. Па тэмпах здачы збожжа дзяржаве лідзіруюць гаспадаркі Віцебскай і Мінскай абласцей, якія перадалі ў кошт дзяржзаказу па 43,9 тыс.т і 76,3 тыс.т, выканаўшы свой план адпаведна на 32,5% і 32%. Прадпрыемствы Магілёўскай вобласці здалі дзяржаве 47,5 тыс.т, выканаўшы свой дзяржзаказ на 29,7%. Сельгасарганізацыі Гомельскай і Брэсцкай абласцей здалі ў кошт дзяржзаказу па 37,3 тыс.т і 45,7 тыс.т збожжа, што склала адпаведна па 28,7% і 28,6% да задання. Гродзенская вобласць выканала план на 27,5%, адгрузіўшы ў кошт дзяржзаказу 54,9 тыс.т збожжа. Па ацэнцы спецыяліста, па якасці - утрыманню клейкавіны і натуры - збожжа новага ўраджаю не горш мінулагодняга. Пастаўкі ў кошт дзяржзаказу знаходзяцца на асаблівым кантролі Мінсельгасхарчу, персанальную адказнасць нясуць кіраўнікі сельгасарганізацый. Усяго ж на элеватары і хлебапрыёмныя пункты з улікам давальніцкага збожжа і прынятага на адказнае захоўванне паступіла 504 тыс.т. Арганізацыі хлебапрадуктаў плануюць нарыхтаваць і адначасова размясціць звыш 3 млн.т збожжа і алейнанасенных культур рапсу, што на 500 тыс.т больш, чым у мінулым годзе. Акрамя дзяржзаказу па харчовым збожжы нарыхтоўчыя арганізацыі дэпартамента па хлебапрадуктах прымаюць збожжа ў кошт узаемаразлікаў, на давальніцкія мэты і г.д. У кошт разлікаў за закупленыя камбікармы ўжо паступіла 390 тыс.т, а ад далучаных да сельгасарганізацый прадпрыемстваў наўпрост прынята 13 тыс.т збожжа.