24 сакавіка, Віцебск /Дзіяна Курыла - БЕЛТА/. XX Міжнародны фестываль мастацтваў "Славянскі базар у Віцебску" пройдзе з 8 па 14 ліпеня 2011 года. Пра гэта сёння на пасяджэнні Віцебскага абласнога выканаўчага камітэта паведаміў начальнік упраўлення культуры Віцебскага аблвыканкама Уладзімір Цярэшчанка, перадае карэспандэнт БЕЛТА. Фарміраванне канцэртнай і тэатральнай праграм яшчэ працягваецца. "Яны будуць складзены такім чынам, каб прыцягнуць больш гледачоў і павысіць акупнасць фестывалю", - падкрэсліў Уладзімір Цярэшчанка. Як чакаецца, у адкрыцці юбілейнага фестывалю прымуць удзел Мікалай Баскаў, арт-групы хор Турэцкага і "Сапрана10", Аляксандр Разенбаўм, балет пад кіраўніцтвам Барыса Эйфмана, Мірэй Мацье, а кульмінацыяй канцэрта, як паабяцаў Уладзімір Цярэшчанка, стане выступленне гурта Space з Дзідзье Маруані. Завершыцца ўсё лазерным шоў пад касмічную музыку гурта. Дзень Беларусі на фестывалі ўпершыню стане выставай дасягненняў рэспублікі ў розных галінах: навуцы, тэхніцы, вытворчасці і, зразумела, культуры. Нацыянальны акадэмічны тэатр імя Янкі Купалы пакажа спектакль "Пінская шляхта", у выставачных залах будуць дэманстравацца работы беларускіх мастакоў, якія прынялі ўдзел у акцыі "Зямля пад белымі крыламі". Увечары адбудзецца канцэрт Анжалікі Агурбаш і яе сяброў Дзмітрыя Малікава, Аляксандра Маршала, Аляксандра Буйнова. У Дзень культуры Расіі пройдзе выступленне дзяржаўнага акадэмічнага рускага народнага хору імя Пятніцкага, які ў 2011 годзе адзначае 100-годдзе. У Дзень Саюзнай дзяржавы на сцэне Летняга амфітэатра будзе спяваць ансамбль "Сябры". Па добрай традыцыі адбудуцца сольныя канцэрты папулярных артыстаў. Чакаецца, што сваіх прыхільнікаў парадуюць Мірэй Мацье, Алена Ваенга, Максім Галкін, Любоў Успенская, Надзея Кадышава, Валерый Меладзе, Аўраам Руса, Аляксандр Разенбаўм, хор Турэцкага, гурт "Мумій Троль". На адкрытай пляцоўцы на плошчы Перамогі пройдуць выступленні Сяргея Лазарава і выканаўцы МакSим. Па словах Уладзіміра Цярэшчанкі, запланавана 25 канцэртаў, у 2010 годзе іх было 19. Галоўнай інтрыгай фестывалю, як і на працягу 20 гадоў, стане міжнародны конкурс маладых выканаўцаў. На працягу двух конкурсных дзён вызначыцца пераможца. Падтрымаюць пачаткоўцаў спевакоў вопытныя майстры эстрады. Сярод іх - Крысціна Арбакайтэ, якая дасць сольны канцэрт у другім аддзяленні аднаго з конкурсных канцэртаў.