12 красавіка, Віцебск /Вольга Багачова - БЕЛТА/. Заключныя мерапрыемствы I Міжнароднага студэнцкага славянскага форуму ў Віцебску пройдуць 21-23 мая, паведамілі карэспандэнту БЕЛТА ў Віцебскім дзяржаўным універсітэце імя П.М.Машэрава.
Адкрые першы дзень прэс-канферэнцыя з удзелам кіраўнікоў дэлегацый ВНУ - удзельніц для СМІ Беларусі і Расіі. Далей адкрыецца выстава "Студэнцкі Арбат", на якой студэнты і выкладчыкі правядуць прэзентацыі сваіх ВНУ па напрамках спорту, адукацыі, навукі і культуры. Крэатыўныя ідэі маладых людзей будуць прадстаўлены на першым міжнародным конкурсе бізнес-праектаў Invest Weekend. Увечары адбудзецца канцэрт-дыскатэка "Віват, студэнцкі форум!".
Напружаным абяцае стаць для моладзі 22 мая. У гэты дзень на розных творчых пляцоўках горада пройдуць конкурс сацыяльнай рэкламы "Адкрыты паказ", конкурсныя праграмы ВНУ ў намінацыях "Вакал", "Харэаграфія", "Арыгінальны жанр" і "Мастацкае слова". Выступленні будуць ацэньваць камісіі міжнароднага журы, склад якіх сфармуюць з прафесіяналаў у той галіне, якую ім трэба будзе ацэньваць.
Цырымонія ўзнагароджання лаўрэатаў і дыпламантаў конкурсных праграм, а таксама пераможцаў конкурсаў, спаборніцтваў, турніраў і іншых мерапрыемстваў, якія былі арганізаваны падчас форуму са снежня 2012 года, адбудзецца на гала-канцэрце. Фанфары апошняга прагучаць 23 мая на галоўнай сцэнічнай пляцоўцы абласнога цэнтра - у Летнім амфітэатры.-0-