Заканапраект аб амністыі ў сувязі з 75-годдзем вызвалення Беларусі ад нямецка-фашысцкіх захопнікаў унесены ў парламент, паведаміла журналістам начальнік упраўлення выканання прыгавораў Дэпартамента выканання пакаранняў МУС палкоўнік унутранай службы Жанна Батурыцкая, перадае карэспандэнт БЕЛТА.
"Распрацаваны праект закона адобраны кіраўніком дзяржавы. Ён унесены на разгляд у парламент, у бліжэйшы час будзе разгледжаны дэпутатамі", - сказала Жанна Батурыцкая.
Традыцыйна прапануецца вызваліць асоб, якія адносяцца да так званай льготнай катэгорыі асуджаных, якія здзейснілі нецяжкія злачынствы. Гэта непаўналетнія, жанчыны і мужчыны, якія маюць дзяцей ва ўзросце да 18 гадоў, цяжарныя жанчыны, пенсіянеры, інваліды I і II групы, хворыя на анкалагічныя захворванні. Асобнай катэгорыі асуджаных прадугледжана скарачэнне тэрміну на адзін год, а непаўналетнім - на два гады.
Амністыя будзе прымяняцца толькі да асоб, якія станоўча характарызуюцца і цалкам пакрылі шкоду, прычыненую злачынствам.
Прапануецца не распаўсюджваць амністыю на тых, хто раней ёю скарыстаўся, але зноў здзейсніў злачынства. Гэта ж датычыцца і тых, хто злосна парушае ўстаноўлены парадак адбыцця пакарання, асабліва небяспечным рэцыдывістам. Прадугледжваецца таксама, што амністыя не будзе распаўсюджвацца на тых, хто здзейсніў пэўныя катэгорыі злачынстваў. Сярод іх злачынствы супраць жыцця і здароўя чалавека, супраць палавой недатычнасці, звязаныя з незаконным абаротам наркотыкаў, здзейсненыя арганізаванай групай, карупцыйныя злачынствы.
Прыняцце закона аб амністыі і яго рэалізацыя не пацягнуць за сабой пагаршэнне крымінагеннай абстаноўкі. "Амністыя прымяняецца, як правіла, да асоб, якія ўпершыню асуджаюцца да пазбаўлення волі, - растлумачыла Жанна Батурыцкая. - Вызваляюцца тыя, хто асуджаны за злачынствы, што не адносяцца да катэгорыі цяжкіх або не ўяўляюць вялікай грамадскай небяспекі".
Заканапраект распрацоўваўся па даручэнні Прэзідэнта Міністэрствам унутраных спраў сумесна з Вярхоўным судом, Генеральнай пракуратурай і іншымі зацікаўленымі ведамствамі.