Зарегистрираванае беспрацоўе ў Беларусі на 1 студзеня захавалася на ўзроўні 0,6%

10 студзеня, Мінск /Алена Прус - БЕЛТА/. У Беларусі на 1 студзеня 2012 года ўзровень зарэгістраванага беспрацоўя склаў 0,6% колькасці эканамічна актыўнага насельніцтва (на 1 студзеня 2011-га - 0,7%). Пра гэта карэспандэнту БЕЛТА паведаміла намеснік начальніка ўпраўлення палітыкі занятасці Міністэрства працы і сацыяльнай абароны Галіна Грынчук. Узровень беспрацоўя ў цэлым па рэспубліцы заставаўся нязменным на працягу некалькіх апошніх месяцаў (на 1 верасня 2011 года гэты паказчык складаў 0,7%, з 1 кастрычніка - 0,6%). У разрэзе рэгіёнаў за снежань беспрацоўе знізілася на 0,1% у дзвюх абласцях краіны: у Брэсцкай - да 0,7%, у Гродзенскай - да 0,6%. У астатніх рэгіёнах зарэгістраванае беспрацоўе захавалася на ранейшым узроўні: у Гомельскай вобласці - 0,9%, у Віцебскай - 0,8%, у Магілёўскай - 0,7%, у Мінскай вобласці - 0,6%, у Мінску - 0,3%. "Сітуацыя на рынку працы стабільная, кіраваная і кантраляваная, - сказала Галіна Грынчук. - Складзеныя тэндэнцыі дазваляюць сцвярджаць, што значных змяненняў сітуацыі з занятасцю насельніцтва ў бліжэйшыя месяцы не будзе. Ад наймальнікаў розных галін эканомікі не паступала паведамленняў аб маючым адбыцца істотным вызваленні работнікаў у студзені-лютым гэтага года". Па словах Галіны Грынчук, у сферы занятасці і беспрацоўя ў снежні 2011 года не назіралася якіх-небудзь "устрэсванняў і падзенняў". Дадзеныя аператыўнай статыстыкі пацвярджаюць гэта: яны суадносяцца са снежнем 2010 і 2009 гадоў.

Спецыяліст адзначыла, што знізілася колькасць зваротаў у дзяржслужбу занятасці за садзейнічаннем у працаўладкаванні і рэгістрацый у якасці беспрацоўнага. Яна патлумачыла гэта тым, што ў рэспубліцы дастаткова шмат вакансій, да гэтай інфармацыі забяспечаны шырокі доступ - любы жадаючы можа азнаёміцца з банкам вакансій, выбраць для сябе прыдатны варыянт працаўладкавання. "Высілкі дзяржслужбы занятасці засяроджаны на аказанні дапамогі ў пошуку працоўнага месца тым людзям, чыё працаўладкаванне па аб'ектыўных прычынах ускладнена, - сказала Галіна Грынчук. - Гэта інваліды; дзеці-сіроты; людзі перадпенсійнага ўзросту; упершыню шукаючыя працу ва ўзросце да 21 года; тыя, хто вярнуўся з месцаў пазбаўлення волі; жанчыны, якія не працавалі ў сувязі з доглядам за дзіцем. Такія людзі маюць патрэбу ў падтрымцы, паколькі не могуць на роўных канкурыраваць з іншымі на рынку працы. Дзяржслужба занятасці дапамагае ім у пошуку запатрабаванай прафесіі, павышэнні наяўнай кваліфікацыі, працаўладкаванні на наяўныя і ствараемыя працоўныя месцы, арганізацыі ўласнай справы". Па аператыўных даных, у 2011 годзе ў службу занятасці за садзейнічаннем у працаўладкаванні звярнуліся 313,3 тыс. чалавек - на 4,7% менш у параўнанні з 2010 годам. Статус беспрацоўнага ў мінулым годзе атрымалі 188,4 тыс. чалавек - на 8,5% менш да ўзроўню 2010 года. Працаўладкаваны за мінулы год 200,8 тыс. чалавек, у тым ліку 130,5 тыс. беспрацоўных (адпаведна на 1,6% і 3,8% менш, чым у 2010 годзе). Пры гэтым мелі патрэбу ў працаўладкаванні ў 2011 годзе 365,8 тыс. чалавек - на 6% менш у параўнанні з 2010 годам. Каэфіцыент напружанасці на рынку працы рэспублікі вельмі нізкі, падкрэсліла спецыяліст. Гэты паказчык на 1 студзеня бягучага года складаў у цэлым па краіне 0,5 беспрацоўнага на 1 вакансію. Прычым напружанасць на рынку працы пастаянна зніжаецца: на 1 студзеня 2011 года было 0,7 беспрацоўнага на вакансію, а ў 2005 годзе - 2 беспрацоўных на вакансію. Колькасць свабодных працоўных месцаў узрасла з 48,8 тыс. на 1 студзеня 2011 года да 51,7 на 1 студзеня 2012-га (на 5,9%). На 1 студзеня бягучага года на ўліку па беспрацоўі ў Беларусі стаялі 28,2 тыс. чалавек. Гэта менш, чым за ўсе аналізаваныя перыяды. Дарэчы, за снежань 2011 года колькасць беспрацоўных знізілася на 1,2 тыс., а ў параўнанні з 1 студзеня 2011-га - на 4,9 тыс. чалавек, або на 12,8%.У поўным аб'ёме забяспечвалася прадугледжаная заканадаўствам сацыяльная падтрымка беспрацоўных. У снежні мінулага года дапамогу налічана больш за 13,6 тыс. чалавек, яе сярэдні памер склаў Br102,3 тыс. Прадстаўнік Мінпрацы і сацабароны паведаміла, што ўрад адобрыў праект Дзяржаўнай праграмы садзейнічання занятасці насельніцтва на 2012 год, і выказала надзею, што дакумент у студзені будзе зацверджаны. Сярод асноўных задач - захаванне стабільнай сітуацыі ў сферы занятасці; інтэграцыя ў працоўную сферу мэтавых груп насельніцтва, якія маюць патрэбу ў сацыяльнай падтрымцы; удасканаленне сістэмы падрыхтоўкі і перападрыхтоўкі кадраў у адпаведнасці з патрэбамі развіцця эканомікі; інфармацыйнае, прафарыентацыйнае, метадычнае забеспячэнне занятасці насельніцтва. Прычым дасягненне гэтых задач будзе ажыццяўляцца не толькі традыцыйнымі мерамі, якія апраўдалі сябе на практыцы (садзейнічанне наймальнікам у стварэнні працоўных месцаў, садзейнічанне беспрацоўным у самастойнай занятасці, прафабучэнне беспрацоўных, адаптацыя інвалідаў да працоўнай дзейнасці, перасяленне на новае месца працы і жыхарства), але і з улікам новых падыходаў. У ліку прыярытэтаў праграмы - удасканаленне маніторынгу стану рынку працы, садзейнічанне наймальнікам у структурнай перабудове эканомікі. Фінансаванне на рэалізацыю мерапрыемстваў дзяржпраграмы садзейнічання занятасці насельніцтва ў 2012 годзе прадугледжваецца ў аб'ёме амаль Br226 млрд.-0-

БЕЛТА