У Віцебскай вобласці завяршыць жніво плануецца на працягу двух тыдняў. Пра гэта паведаміў сёння журналістам, адказваючы на пытанне карэспандэнта БЕЛТА, старшыня Віцебскага аблвыканкама Мікалай Шарстнёў.
"Каб цалкам завяршыць уборку, нам неабходна 12-14 дзён. Да канца жніўня павінны справіцца. У прынцыпе, вобласць у гэты час звычайна і завяршала ўборку", - канстатаваў Мікалай Шарстнёў.
Старшыня аблвыканкама адзначыў, што аграрыі Віцебскай вобласці не разбалаваны надвор'ем. Сёлета найбольш складана прыйшлося працаўнікам вёскі заходніх раёнаў, дзе пераважаюць гліністыя глебы. Вясной яны два месяцы былі зусім без вільгаці, цяпер пакутуюць з-за штодзённых дажджоў. "Тым не менш, 60% плошчаў у рэгіёне ўжо ўбрана. Важны і той факт, што на раніцу 13 жніўня ў нас ёсць поўны запас харчовага збожжа: больш за 60% пастаўлена па дзяржзаказе, астатняе знаходзіцца на дапрацоўцы ў гаспадарках і на камбінатах хлебапрадуктаў", - падкрэсліў кіраўнік вобласці.
Асобную ўвагу Мікалай Шарстнёў акцэнтаваў на захаванні тэхналогіі вырошчвання глебы. У гаспадарках, дзе яе прытрымліваюцца, ураджайнасць дасягае 70-80 ц/га, а на некаторых так званых палях аграномаў - аж да 120 ц/га. "Гэта даказвае, што ў вобласці можна атрымліваць высокі ўраджай", - сказаў кіраўнік.