24 студзеня, Віцебск /Вольга Багачова - БЕЛТА/. Гендарная бітва абвешчана на дарогах Віцебскай вобласці. У фокусе прыцэла радараў і пільных вачэй дзяржаўтаінспектараў - жанчыны-кіроўцы. Прычына краху раўнапраўя - не ў анекдотах, а ў шматлікіх і часам смяротных парушэннях правілаў дарожнага руху прадстаўніцамі прыгожага полу, паведамілі карэспандэнту БЕЛТА ў аддзяленні агітацыі і прапаганды ДАІ УУС Віцебскага аблвыканкама. У Віцебскай вобласці па віне жанчын-кіроўцаў за 2011 год адбылося 73 аварыі, у якіх загінулі 11 чалавек і больш за 80 атрымалі траўмы рознай ступені цяжкасці. За розныя парушэнні ПДР да адміністрацыйнай адказнасці былі прыцягнуты амаль 20 тыс. жанчын. Пры гэтым сем жанчын дазволілі сабе сесці за руль у стане алкагольнага ап'янення паўторна на працягу года, 357 селі за кіраванне, не маючы правоў, 927 праігнаравалі выкарыстанне рамяня бяспекі, 236 у момант руху размаўлялі па мабільным тэлефоне, 170 перавышалі ўстаноўленую хуткасць руху. Кропкай кіпення для абласной Дзяржаўтаінспекцыі стала аварыя, якая адбылася днём 22 студзеня ў Лепельскім раёне. Па віне 22-гадовай жыхаркі вёскі Новыя Валосавічы з паўтарагадовым кіроўчым стажам, якая не ўлічыла складаныя ўмовы надвор'я і груба парушыла правілы дарожнага руху (выехала на паласу сустрэчнага руху), загінулі яе ўласная малалетняя дачка 2008 года нараджэння і жыхарка Віцебска 1986 года нараджэння, яшчэ чацвёра чалавек, у тым ліку і сама кіроўца, паранены. Дзяржаўтаінспекцыя Віцебскай вобласці ўзмацняе кантроль за кіраваннем транспартам жанчынамі. Асаблівую ўвагу інспектары ДПС нададуць тым з іх, у каго кіроўчы стаж не перавышае двух гадоў. "Велізарная просьба да дадзенай катэгорыі ўдзельніц дарожнага руху: калі вы сумняваецеся ў сваіх навыках і не маеце дастатковага вопыту кіравання - не рызыкуйце сваім і жыццём тых, хто знаходзіцца ў вашым аўтамабілі", - звярнуліся да жанчын-кіроўцаў ва ўпраўленні ДАІ УУС Віцебскага аблвыканкама. Як падкрэслілі ў ДАІ, аднавіць страчаны давер жанчынам-кіроўцам магчыма толькі няўхільным выкананнем ПДР і падаючы сабой прыклад паводзін на дарогах усім іншым удзельнікам дарожнага руху, у тым ліку мужчынам-кіроўцам. -0-

БЕЛТА