Ад рэабілітацыі інвалідаў да дапамогі самотным грамадзянам пажылога ўзросту і беспрацоўным – сфера дзейнасці гэтай службы даволі шырокая.
Ад рэабілітацыі інвалідаў да дапамогі самотным грамадзянам пажылога ўзросту і беспрацоўным – сфера дзейнасці гэтай службы даволі шырокая. Адрэснасць, выяўленчы характар і комплексны падыход да вырашэння праблем кожнага чалавека – вось тыя прынцыпы, на якіх грунтуецца яе праца. Зрэшты, да гэтай новай мадэлі прыйшлі не адразу: у Беларусі сістэма сацыяльнай абароны насельніцтва існуе даўно. «Як усё пачыналася і якіх поспехаў ужо дасягнулі?» -- успомнілі на 95-гадовым юбілеі гэтай службы ў РДК.
Як заўважыў начальнік упраўлення па працы, занятасці і сацыяльнай абароне Лепельскага райвыканкама Васіль Равовы, у сваім развіцці сацыяльная праца ў нашай краіне набыла розныя формы -- ад міласэрнасці да грамадскага прызрэння да арганізаванай дзяржаўнай сістэмы сацыяльнай абароны. Сёння гэтыя формы добра спалучаюцца з разнастайнымі відамі грамадскай і прыватнай дабрачыннай дзейнасці.
95 гадоў – амаль цэлае стагоддзе. За гэты час сацыяльная служба не раз прайшла рэарганізацыю. Змяняліся часы, назвы, кіраўнікі, работнікі… Створаны ў 1929 годзе раённы аддзел сацыяльнага забеспячэння толькі ў 2007 годзе стаў цалкам той структурай, якую мы ведаем зараз. Сёння ва ўпраўленні па працы, занятасці і сацыяльнай абароне насельніцтва райвыканкама працуе 13 супрацоўнікаў, якія выконваюць 41 адміністрацыйную працэдуру. У структуры ўстановы тры аддзелы: аддзел прызначэння пенсій, аддзел сацыяльна-працоўных адносін і аддзел занятасці насельніцтва. Як самастойная юрыдычная асоба з 2002 года дзейнічае Тэрытарыяльны цэнтр сацыяльнага абслугоўвання насельніцтва. У кожнага з васьмі аддзяленняў цэнтра свае функцыі: ад абслугоўвання на даму грамадзян пажылога ўзросту і інвалідаў да аказання адраснай сацыяльнай дапамогі і разавых паслуг па сацыяльна нізкіх цэнах.
У 2013 годзе адкрыта новае аддзяленне для пажылых грамадзян. Усяго ў рэспубліцы такіх аддзяленняў – 15, у вобласці – пяць. Паказчык па колькасці абслугоўваемых грамадзян аддзяленнем сацыяльнай дапамогі на даму перавыкананы на 5,4 працэнта. Перавыкананы ў два разы і паказчык камітэта па разавых паслугах. Сёння звыш 250 мільёнаў рублёў складае пазабюджэт. Дзейнічаюць дзве працоўныя майстэрні, праграма працы з інвалідамі.
Падобныя ўрачыстасці прайшлі ў кожным раёне, але работнікам райвыканкама падзякі за дапамогу сацыяльнай службе былі ўручаны толькі ў трох з іх. У гэту тройку трапіў і Лепельскі раён. Так, падзякамі за значны асабісты ўклад у рэалізацыю дзяржаўнай сацыяльнай палітыкі былі адзначаны старшыня райвыканкама Барыс Ефрэмаў, намеснік старшыні Мікалай Нікіцін і начальнік фінансавага аддзела Святлана Анышка. Ганаровымі граматамі абласнога камітэта атрымалі дырэктар ТЦСАН Наталля Іванова, загадчыца аддзялення сацыяльнай дапамогі на даму Эльвіра Падлепенкіна і загадчыца аддзялення дзённага знаходжання для інвалідаў Алена Памяціха. Падзякамі абласнога камітэта адзначаны кіраўнік гуртка аддзялення дзённага знаходжання для інвалідаў Аляксей Шаўчэнка, псіхолаг аддзялення сацыяльнай адаптацыі і рэабілітацыі Эла Хацкевіч і кіроўца Васіль Аўсіевіч.