18 чэрвеня, Мінск /Кар. БЕЛТА/. Старшыня Камітэта дзяржаўнага кантролю Беларусі Зенон Ломаць, наведваючы Дубровенскі раён, падвергнуў крытыцы мясцовыя органы ўлады за неефектыўнае выкарыстанне зямлі. Пра гэта паведамілі карэспандэнту БЕЛТА ў прэс-службе КДК. Дзяржкантроль правёў маніторынг сітуацыі ў гэтым раёне. Старшыня КДК адзначыў, што раённая землеўпарадкавальная служба не заўсёды на належным узроўні выконвае ўскладзеныя на яе функцыі. У шэрагу вёсак ужо доўгі час не выкарыстоўваюцца зямельныя ўчасткі пасля зносу былымі ўласнікамі дамоў, яны зараслі хмызняком і пустазеллем. Як сказаў кіраўнік КДК, землеўпарадкавальная служба не ажыццяўляе належнага кантролю і за землямі сельскагаспадарчага прызначэння, якія знаходзяцца ў пастаянным карыстанні сельгаспрадпрыемстваў. Так, устаноўлены факты невыкарыстання земляў сельскагаспадарчага прызначэння ў КУСГП "Зарубы", ПСГ "Калгас Баброва", КУСГП "Прыдняпроўскі", КУСГП ім. Чарняхоўскага, ААТ "Аграбудскае", ПСГ "Калгас 40 год Кастрычніка". Не наладжана шырокае інфармаванне грамадзян аб наяўнасці вольных (незанятых) зямельных участкаў, размешчаных у Дубровне і ў сельскіх населеных пунктах раёна, якія могуць быць прадастаўлены грамадзянам для будаўніцтва і абслугоўвання жылых дамоў і калектыўнага садаводства. Дапушчаны парушэнні як у фарміраванні пералікаў вольных зямельных участкаў, так і ў распаўсюджванні звестак аб іх наяўнасці. Старшыня Камітэта дзяржкантролю падкрэсліў, што праца па забеспячэнні выканання зямельнага заканадаўства і навядзенні парадку на зямлі з'яўляецца адной з найважнейшых абавязкаў мясцовай улады, і запатрабаваў ад Дубровенскага райвыканкама правядзення гэтай працы на належным узроўні. На пасяджэнні райвыканкама Зенон Ломаць адзначыў, што гэтыя пытанні будуць знаходзіцца на пастаянным кантролі КДК.