12 июля 2012

Год кнігі

12 ліпеня, Лепель /Уласн.інф./. Шмат удзельнікаў і гасцей сабраў фестываль беларускай кнігі, які прайшоў у Бароўцы.

12 ліпеня, Лепель /Уласн.інф./. Шмат удзельнікаў і гасцей сабраў фестываль беларускай кнігі, які прайшоў у Бароўцы. У мясцовым цэнтры культуры і вольнага часу сабраліся бібліятэкары раёна, удзельнікі літаратурна-музычнага клуба “Выток” раённага Дома культуры, аўдыторыю напоўнілі шумныя, звонкія галасы, дзяцей і падлеткаў, якія адпачываюць у бароўскім летніку і папраўляюць здароўе ў дзіцячым рэабілітацыйным цэнтры “Жамчужына”.

Прыехалі таксама госці – члены Саюза пісьменнікаў Беларусі Тамара Краснова-Гусачэнка і Барыс Беляжэнка.

Праграма фестывалю прадугледжвала літаратурна-музычную кампазіцыю “Песняры “Зямлі пад белымі крыламі”, акцыю “Чытаем разам, чытаем па-беларуску!” Маленькіх чытачоў чакаў “Вясёлы кнігавоз” з казкамі, вершамі і прыгодамі, віктарына “Беларуская казка-мудрая падказка”, конкурсна-гульнёвая праграма “Цікавая вандроўка па Кнігаградзе”.

Адмыслова да свята былі наладжаны кніжныя выставы “Яе вялікасць Кніга”, “Вершаў любімыя радкі”, ”Кніга з аўтографам”, якая распавяла пра сустрэчы ў бібліятэцы са знакамітымі пісьменнікамі, “Беларускія кнігі-юбіляры 2012года” і інш. Падведзены вынікі акцыі “Чытацкая стужка”, пад час якой створана “цудоўнае дрэва”, да якога кожны ўдзельнік, прачытаўшы беларускую кнігу, мог прымацаваць сваю галінку.

Удзельнікі і госці фестывалю пачыталі вершы, абмяняліся думкамі пра літаратурны працэс, выявілі сваё стаўленне да беларускай кнігі. Адбыўся экспрэсіўны дыялог з няўрымслівай дзіцячай аўдыторыяй – дыялог пакаленняў.

Фестываль прымеркаваны да Году кнігі і юбілеяў нашых літаратурных класікаў Янкі Купалы, Якуба Коласа, Максіма Танка.

Віктар ЛЯШЧЫНА.

На здымку: кніжны фестываль у Бароўцы.