28 марта 2011

Магазін на заводзе

 Вытворцы самай рознай прамысловай прадукцыі зараз актыўна шукаюць бліжэйшыя шляхі да спажыўцоў. Развіваецца сетка фірменнага гандлю, праз якую пакупнікі па сабекошце могуць набыць неабходныя ім тавары. У адным з прасторных памяшканняў адміністрацыйнага корпуса электрамеханічнага завода адкрыўся магазін рознічнага продажу тавараў народнага спажывання, якія вырабляюцца на прадпрыемстве. Уваход сюды свабодны для любога наведвальніка.

 Пакупнікоў уражвае сучаснае афармленне гандлёвай залы, утульнае і зручнае для агляду размяшчэнне тавараў, выдатнае электрычнае асвятленне,пануючыя паўсюдна чысціня і парадак.

 Унутры гандлёвай кропкі напаткаў пакупніцу – рабочую філіяла “Лепельскі” ЗАТ “Віцебскаграпрадукт” Галіну Дук.
-- Знаёмлюся з асартыментам прадстаўленых тавараў, -- паведаміла яна. – Зацікавіў двухспальны ложак, які каштуе ўсяго 684 тысячы рублёў.

 Прыцэньваюся да выстаўленага на продаж адносна недарагога “кутка школьніка”, у камплект якога ўваходзяць камп’ютарны стол, шафа для кніг, навясныя паліцы і іншыя прыстасаванні, якія займаюць невялікую плошчу пры размяшчэнні ў жылым пакоі і вельмі зручныя для выкарыстання.
-- Паколькі без камп’ютара зараз нельга ўявіць сучасную кватэру або дом, у нашай гандлёвай кропцы прадстаўлены такія вырабы не толькі для школьнікаў, але і для дарослых, -- дадала прадавец магазіна Наталля Седзіна. – У нас можна купіць і прыгожую шафу для захоўвання адзення і бялізны, абедзенны стол, тумбу пад тэлевізар, табурэткі розных памераў. Дарэчы, прымаюцца заяўкі на выраб мэблі нават па чарцяжах заказчыкаў.

 Шмат маецца і дробязных рэчаў, без якіх тым не менш бывае вельмі цяжка абысціся ў хатняй гаспадарцы: падстаўкі для кветак, раздзелачныя дошкі, хлебніцы і г. д.
-- Буйнагабарытныя рэчы можам па просьбе пакупніка даставіць дадому транспартам прадпрыемства, -- адзначыў начальнік аддзела кіравання якасцю, маркетынгу, продажу і тэхнічнага сэрвісу электрамеханічнага завода Андрэй Каротчык. – Зразумела, што гэта можна зрабіць толькі ў дні, калі працуе прадпрыемства.
 
Мікалай ГАРБАЧОЎ

На здымку: пакупніца ўважліва знаёміцца з асартыментам прадстаўленых у магазіне тавараў.
Фота аўтара