Як ні шчыруюць будаўнікі, аднак угнацца за попытам на кватэры не могуць. Таму дзяржава ўсяляк заахвочвае насельніцтва да індывідуальнага будаўніцтва.

 Землеўпарадкавальная служба вядзе ўлік свабодных зямельных участкаў. Зараз іх у горадзе налічваецца 25 плошчай 15 і адзін -- 12 сотак. Дзесяць надзелаў знаходзяцца па вуліцы Кляшторнага, шэсць -- Коцарава, пяць -- Пржавальскага, два -- Мінскай, па аднаму -- Якуба Коласа, Караленкі і завулку Паўднёвы.

 У сельскіх населеных пунктах зямельныя надзелы большыя -- ад 15 да 25 сотак. У Баброўскім сельсавеце свабоднымі лічацца тры ўчасткі ў Баброве і адзін у Завадзіне; у Горскім -- два ў Будзішчы; Стайскім -- восем у Юркоўшчыне, пяць у Заазер’і, па чатыры ў Падлобных, Селішчы і Ворані, два ў Дзяньгубах, адзін у Окане; Каменскім -- восем у Камні, два ў Мягелях, па адным у Двор-Бабчы, Курмялёўцы, Парэччы, Губіне, Двор-Парэччы; Валосавіцкім -- па адным у Новых Валосавічах і Каміншчыне; Пышнянскім -- па адным у Крыўцах і Пунішчы; Слабадскім -- два ў Рудні, па адным у Слабадзе і Верабках.

 Найбольшым попытам у сельскай мясцовасці карыстаюцца ўчасткі ў населеных пунктах, размешчаных паблізу азёраў. Гэта вёскі Бор і Паземшчына Каменскага, Дворышча і Завідзічы Лепельскага, Окана, Селішча і Ворань Стайскага сельсаветаў. Такія зямельныя надзелы прадаюцца на аўкцыёнах. Так, у 2009 годзе было прададзена 28, сёлета -- 25 участкаў на агульную суму адпаведна 105 і 94 мільёны рублёў. Выручаныя грошы ідуць на развіццё інфраструктуры, сацыяльнай сферы сельскіх населеных пунктаў, падрыхтоўку новых зямельных кадастраў на ўчасткі пад забудову.

 Кожны вясковец, які мае патрэбу ў паляпшэнні жыллёвых умоў, у сваім сельсавеце мае права атрымаць пад забудову любы свабодны зямельны ўчастак, нават падрыхтаваны да аўкцыёну, бясплатна.

 Месцамі масавай індывідуальнай забудовы ў Лепелі лічацца мікрараёны Поўдзень-1 (паміж Аршанскай шашой і аўтадарогай Мінск -- Віцебск) і Савецкая -- Чуйкова (у раёне аўтазапраўкі). Раней забудоўшчык афармляў дакументацыю на ўчастак і сам падводзіў да яго электрычнасць, насыпаў пад’езд і г.д. 27 ліпеня 2009 года выйшла Пастанова Савета Міністраў Рэспублікі Беларусь №983, у якой распрацаваны палажэнні парадку фінансавання, праектавання, будаўніцтва і рэканструкцыі аб’ектаў інжынернай і транспартнай інфраструктуры для раёнаў жылой забудовы, у тым ліку сядзібнай. Цяпер, перш чым размяркоўваць участкі ў месцах масавай сядзібнай забудовы, пракладваюцца камунікацыі -- электралініі, дарогі, газаправоды, сістэма водазабеспячэння.

 Першыя забудоўшчыкі мікрараёна Поўдзень-1 у бездараж пакідалі легкавікі на Аршанскай шашы і ў гумовых ботах мясілі гразь да сваіх новабудоўляў. Пасля выхаду Пастановы становішча карэнным чынам змянілася. Перш, чым раздаваць участкі, ствараецца інфраструктура. У 2009 годзе на яе аб’екты ў мікрараёнах масавай прыватнай забудовы Поўдзень-1 і Савецкая -- Чуйкова асвоена 1199550, летась -- 1695975 мільёнаў рублёў.

 22 лютага 2011 года выйшаў Указ Прэзідэнта Рэспублікі Беларусь №65 “Аб некаторых пытаннях фінансавання будаўнічых аб’ектаў інжынернай і транспартнай інфраструктуры для раёнаў жылой забудовы і аб’ектаў інфраструктуры атамнай электранстанцыі ў Рэспубліцы Беларусь”, у якім прадугледжваецца павелічэнне аб’ёмаў фінансавання ўзвядзення аб’ектаў інфраструктуры ў раёнах масавай сядзібнай забудовы. Канчатковыя сумы пакуль не зацверджаны, аднак ужо вядома, што яны будуць перавышаць ранейшыя ў некалькі разоў.

Уладзімір ШУШКЕВІЧ