3 января 2014

На абсягах культуры

Прайшлі тры туры агляда-конкурса сярод аграгарадкоў раёна “Агракруіз-2013”. Праграма ўтрымлівала конкурс сацыяльных відэаролікаў “Цана жыцця”, на які паступалі ролікі на тэмы здаровага ладу жыцця і года беражлівасці.

“Бітва аграгарадкоў”

Прайшлі тры туры агляда-конкурса сярод аграгарадкоў раёна “Агракруіз-2013”. Праграма ўтрымлівала конкурс сацыяльных відэаролікаў “Цана жыцця”, на які паступалі ролікі на тэмы здаровага ладу жыцця і года беражлівасці. Наступным быў конкурс кулінарных вырабаў “Смакавая гамма”, адказнымі за яго прызначылі бібліятэкараў аграгарадкоў. Цікавым атрымаўся гумарыстычны конкурс “Відэаанекдот нашага аграгарадка”. Парадаваў гледачоў конкурс мастацкай самадзейнасці “Таленты нашага аграгарадка”. А вось на конкурсе “Сінема” аўтары мусілі быць у адначассі і сцэнарыстамі, і прадзюсерамі, і рэжысёрамі ўласных фільмаў.

Пераможцамі ў трох зонах аказаліся аграгарадкі “Слабада”, “Баброва”, “Стаі”. У наступным годзе на “Бітву аграгарадкоў” – менавіта так называлі спаборніцтвы – будуць выкліканы прадстаўнікі іншых раёнаў.

У свет мастацтва

На сцэне раённага Дома культуры прайшло пасвячэнне ў свет мастацтва першакурснікаў, навучэнцаў раённай школы мастацтваў. Былі паказаны лепшыя выступленні вучняў мастацкай школы. Першакурснікі атрымалі адмысловыя пасведчанні. А гледачамі сталі іх родныя і блізкія – бацькі, бабулі, дзядулі.

Віктар ЛЯШЧЫНА.