Прыгожы жылы мікрараён з 60 і 40-кватэрных дамоў узведзены ў апошнія гады ў Лепелі абапал вуліцы Чуйкова. Відавочна, Лепель усё больш набывае абрысы еўрапейскага горада, ў якім створаны неабходныя ўмовы для працы і пражывання людзей.

 Забудова мікрараёна працягваецца. Прыцягваюць увагу два вялікія будаўнічыя краны рыштаванняў чарговага 60-кватэрнага дома.

 -- Заканчваем цагельную кладку чацвёртага паверха, прыступілі да ўзвядзення пятага, -- паведаміў брыгадзір брыгады муляраў ПМК-75 Анатоль Буйлоў. – Вызначаюцца стараннем муляры Міхаіл Стайноў, Ігар Пазняк, Сяргей Пшонка, Андрэй Залатухін, Васіль Фралоў і іншыя. Усяго тут занята сорак чалавек з маёй брыгады, а астатнія пятнаццаць будуюць жылыя домікі ў Старым Лядне і абуладкоўваюць падвальныя памяшканні двух 40-кватэрных жылых дамоў, што ўзводзяцца ў Бароўцы.

 На нашым аб’екце задзейнічаны і тры брыгады цесляроў, якія ўзначальваюць Сяргей Машара, Віктар Міснік і Пётр Лобкіс, а таксама брыгада маляроў-тынкоўшчыкаў на чале з Леанардай Старавойтавай. Заліваюцца бетонам сцяжкі на падлозе, тынкуюцца сцены, адкосы, хутка пачнецца ўстаноўка вокан і дзвярэй, металічнай агароджы балконаў, выкананне іншых неадкладных будаўнічых работ.

 -- Як доўга яшчэ прыйдзецца тут працаваць мулярам?
-- На гэтым доме будзем рупіцца на працягу верасня, а ў кастрычніку -- на іншых аб’ектах, і перш за ўсё на ўзвядзенні жылля ў Бароўцы.