2 марта 2012

Пральная машына і печ

Работнікі Цэнтра банкаўскіх паслуг № 211 філіяла № 214 ААТ “Беларусбанк” пастаянна пашыраюць спектр паслуг. Адным з асноўных накірункаў работы Цэнтра з’яўляецца прыём грашовых укладаў ад насельніцтва.

 Аформіўшы ўклад у Цэнтры банкаўскіх паслуг, нашы кліенты  становяцца ўдзельнікамі розыгрышу прызоў. У пачатку гэтага года   сярод кліентаў, якія аформілі тэрміновыя банкаўскія ўклады ў беларускіх рублях “Шанс”, разыграны каштоўныя прызы. Уявіце сабе, што з 50 пераможцаў розыгрышу, якія сталі ўладальнікамі каштоўных прызоў, двое -- жыхары нашага раёна! Гэта лепяльчанін Віктар Пляшко і жыхарка вёскі Губіна Эра Скавародка. Віктар Яўгенавіч выйграў пральную машыну “Атлант”, а Эра Аляксееўна –- мікрахвалевую печ “Гарызонт”.

Пераможцаў розыгрышу наведалі намеснік дырэктара ЦБУ № 211 Любоў Носік, начальнік аддзела рознічнага бізнэсу Юлія Далабей і галоўны спецыяліст гэтага ж аддзела Святлана Сімака.

 Віктар Пляшко -- на заслужаным адпачынку. Сваё жыццё у свой час звязаў з Узброенымі Сіламі –- служыў у ваенных часцях у Бароўцы, Заслонаве. Апошнім часам працаваў егерам у паляўнічай гаспадарцы. Жонка Віктара Яўгенавіча Ганна Мікалаеўна працуе кантралёрам на Лепельскім электрамеханічным заводзе.

 Са шчырай усмешкай сустрэла гасцей і жыхарка вёскі Губіна Эра Аляксееўна Скавародка. 35 год жанчына знаходзіцца на пенсіі. Родам Эра Аляксееўна з вёскі Заслаўкі. Працоўны шлях пачала ткачыхай на Віцебскім дывановым камбінаце. У свой час працавала таксама на прадпрыемстве “Шкловалакно” ў Полацку, у прафілакторыі “Палімір” у Наваполацку.

Святлана СІЛЬВАНОВІЧ, фота аўтара
На здымку: намеснік дырэктара ЦБУ № 211 Любоў Носік павіншавала Эру Аляксееўну Скавародка з перамогай у розыгрышы.